Sa resepyong ginanap kagabi sa Pasuguan ng Pilipinas sa Beijing para sa CRI Serbisyo Filipino at mga nagtapos, guro at mag-aaral ng Philippine Studies sa Peking University, ipinahayag ni Ambassador Erlinda Basilio ang pasasalamat sa malaking ambag ng dalawang grupo sa pagpapasulong ng ugnayan sa pagitan ng Pilipinas at Tsina.
Sa kauna-unahang pagkakataon ay binuksan ni Amb. Basilio ang kanyang tahanan para sa ilang piling panauhin. Sinabi niyang tulad ng Tsina, pinahahalagahan din ng Pilipinas ang kapayapaan. Kinikilala nito ang mahabang kasaysayan ng pagkakaibigan ng dalawang bansa. At ang China Dream ay katulad din ng adhikain ng Pamahalaang Pilipino na paunlarin ang pamumuhay ng mga mamamayan nito. Dagdag niya na ang ganitong mga pagtitipon ay mainam na paraan para maipaliwanag ng husto ang perspektibo ng mga Pilipino lalo pa't may di-pagkakaunawaan sa pagitan ng dalawang panig.
Ayon sa Sugong Pilipino ang salu-salo ay isang paraan nang pagpapalalim ng pagkakaibigan at pagpapaabot ng taos pusong hangarin ng mga Pilipino na palaguin ang ugnayan ng dalawang bansa.
Sa Sabado, lalahok ang Pasuguan ng Pilipinas sa taunang Charity Fair ng Ministry ng Ugnayang Panlabas ng Tsina. Inaanyayahan ni Amb. Basilio ang lahat ng mga Pilipino na suportahan ang baratilyong pangkawanggawa na gaganapin sa Chaoyang Park, Beijing simula 10:00 ng umaga. Pagkakataon na rin ito para sa mga kababayan na makabili ang mga produkto mula sa Pilipinas na mahirap mahanap dito sa Beijing.
Ulat ni Machelle Ramos
1 2 3
