Ang Tsina ay isang unipikadong bansang may iba't ibang nasyonalidad at ang lahat ng mga nasyonalidad ay may sariling katangi-tanging kultura.
Sa artikulong ito, ibabahagi namin sa inyo kung paano pinahahalagahan at pinapaunlad ng iba't ibang panig ang kultura ng mga nasyonalidad.
Si Gng. Wang Zhenfang ay isang babae ng lahing Qiang ng Beichuan County, Lalawigang Sichuan ng Tsina. Upang mapangalagaan ang katutubong kultura ng lahing Qiang, maraming isinasagawa ang pamahalaan sa iba't ibang antas, lalo na sapul nang yanigin ang lugar ng super-lindol noong taong 2008. kaugnay nito, ganito ang sinabi G. Zhou Heping, Pangalawang Ministrong Pangkultura ng Tsina.
"Walang sariling titik ang lahing Qiang at berbal na nasasalin lamang ang katutubong kultura nito na gaya ng awitin at burda. Upang maprotektahan ito, gagamitin namin ang mga hay-tek para mapalawak ang digital museum at database."
Sa totoo lang, ang pangangalaga sa kulturang Qiang ay bahagi lamang ng pagpoprotekta ng Tsina sa iba't ibang katutubong kultura. Sapul nang itatag ang Republika ng Bayan ng Tsina noong taong 1949, sa maraming batas at regulasyon ng Tsina, mababasa ang mga istipulasyon hinggil sa pangangalaga at pagpapaunlad ng mga katutubong kultura. Kasabay nito, nag-organisa rin ang Pamahalaang Tsino ng mga dalubhasa para mangolekta ng mga materyal at impormasyon na may kinalaman sa kultura ng iba't ibang nasyonalidad. Ganito ang inilahad ni G. He Xingliang, mananaliksik mula sa Chinese Academy of Social Sciences.
"Ang aming pinangangalagaan at inikokolektang nilalaman ay kinabibilangan ng katutubong kaugalian, kapistahan, musika, sayaw, opera, balada, acrobatics, etiketa, tradisyonal na paraan ng produksyon, eskultura, painting, burda, paghahabi, katutubong wika, alamat, epiko, katutubong kuwento at iba pa."
Bukod dito, maraming dokumentaryo hinggil sa iba't ibang katutubong kulturang Tsino ang nai-vedio rin ng mga may kinalamang panig. Ang kultura ng lahat ng mga pambansang minoridad ay nailakip na sa pambansang listahan ng mga intangible pamanang kultural.
Sa mga pamantasan at kolehiyo naman, binuksan din ang mga major hinggil sa katutubong kultura at sining. Buong-sikap na nagpapalaganap din ang pamahalaan sa iba't ibang antas ng mga libro, CD at video hinggil sa kultura ng mga pambansang minoridad. Idinaraos din ng pamahalaan sa iba't ibang antas ang mga aktibidad na pansining para makapagtamasa ng makukulay na kultura ng mga pambansang minoridad ang mga mamamayang Tsino.
Kaugnay ng panganalaga sa kultura ng mga pambansang minoridad, ganito ang idiniin pa ni G. He mula sa Chinese Academy of Social Sciences.
"Ang pangangalaga sa tradisyonal na kultura at pagkakaiba-iba ng kultura ay nagsisilbing ugat na pangkultura ng isang bansa. Dapat isanib ang inobasyong kultural sa pangangalaga sa tradisyon. Kung walang tradisyonal na kultura, walang makabagong kultura at kung hindi maangkop sa makabagong lipunan ang tradisyon, mahihirapan itong masalin. "
Salin: Jade
