Sa isang pulong ng United Nations Human Rights Council(UNHRC), sinabi kahapon ni Wang Qun, Embahador ng Pirmihang Delegasyon ng Tsina sa UN sa Geneva, na itinuturing ng Tsina ang paggalang at paggarantiya sa karapatang pantao bilang saligang prinsipyo sa pamamahala ng bansa, at isinasagawa nito ang mabibisang hakbangin para sa pagpapasulong sa karapatang pantao.
Sinabi niyang pagkaraang maganap ang paglala ng situwasyong panseguridad sa Libya, isinasagawa ng Tsina ang maayos na paglilikas sa mga mamamayang Tsino mula doon, at sa kasalukuyan, mga 35,860 na ang umalis mula sa Libya Ang mga ito aniya'y nagpapakita ng ideya na iginagalang ng Tsina ang buhay ng mga mamamayan, pinahahalagahan ang karapatang pantao at ipinangangasiwa ang bansa batay sa prinsipyong "pagpapahalaga sa interes ng mga mamamayan".
Tinukoy pa niyang dahil sa mga negatibong elementong dulot ng krisis na pinansyal, pagbabago ng klima, krisis ng pagkaing-butil at mga grabeng kapahamakang-likas, kinakaharap ang mga hamong ito ng mga mamamayan ng iba't ibang bansa sa daigdig, lalo na ng mga umuunlad na bansa upang matamasa ang pagkakaroon ng karapatang pantao, karapatang mabuhay at karapatang umunlad. Aniya pa, kung hindi totohanang maaayos ang di-balanseng kaayusang pandaigdig at mapapawi ang kahirapan, hindi maisasakatuparan ang pangangalaga at pagpapasulong sa karapatang pantao. Hinimok din niya ang mga maunlad na bansang dagdagan ng mga ito ang suporta sa mga umuunlad na bansa sa pamamagitan ng pondo at teknolohiya, at buong sikap nilang paliitin ang agwat sa pagitan ng mga bansa sa timog at hilaga ng daigdig para maisakatuparan ang komong kasaganaan, at sa gayon, magtamasa ang kada tao ng pundamental na karapatang pantao.