Nagbitiw sa kanyang puesto bilang Senador ng Republika ng Pilipinas si Ginoong Juan Miguel Zubiri ngayong Miyerkoles at nagsabing lubhang nasaktan ang kanyang pamilya sa mga akusasyon ng kanyang nakatunggali sa nakalipas na halalan. Ang binabanggit niya'y si Atty. Aquilino "Koko" Pimentel III na natalo ni Zubiri para sa ika-labing-dalawang puesto.
Sa kanyang privilege speech kanina, sinabi ni Ginoong Zubiri na wala siyang inaaming kamalian o kasalanan sa nakalipas na halalan. Inakusahan umano siya ng kanyang mga nakalaban sa politika at naging mabangis ang mga akusasyon laban sa kanya.
Idinagdag ni Ginoong Zubiri na siya'y nagbibitiw hindi sa dahilang napagod sa pagiging mambabatas at kailanma'y 'di napagod sa paglilingkod sa tao. Hindi rin umano siya nagbibitiw upang makaiwas sa magiging hatol ng Senate Electoral Tribunal. Siya umano'y nagbitiw dahilan sa halos hindi na niyamakayanang mga akusasyon.
Pinapurihan naman ni Pangalawang Pangulong Jejomar Binay si Ginoong Juan Miguel Zubiri at lubos na iginagalang ang dahilan sa pagbibitiw mula sa Senado. Sa pagbibitiw umano ni Ginoong Zubiri, higit na lumakas ang paniniwala ng mga mamamayan sa mga pinuno ng bansa at nagpapakita ng pagiging maginoo sa mga political institution. Dalangin din ni Ginoong Binay na magpatuloy si Ginoong Zubiri ng kanyang mga adhikain partikular sa Kalikasan kahit na isang pribadong mamamayan lamang.
SA KAMAYNILAAN, nasuspinde pa rin ang mga klase sa mababa at mataas na paaralan sa iba't ibang bahagi ng metropolitan area dahilan sa patuloy na pag-ulan. Ang mga pag-ulang ito ang dahilan ng mga pagbaha sa iba't ibang lansangan. Nahirapan din ang mga mag-aaral na makauwi dahilan sa pabugso-bugsong pag-ulan.
Comments
Nagbabagang Paksa
Kompetisyon ng Talento at Kakayahan para sa mga Tagasubaybay sa Buong Daigdig
