LABING-TATLONG mahahalagang panukalang batas ang ipinaabot ni Pangulong Benigno Simeon Cojuangco Aquino III sa pagpupulong ng Legislative Executive Development Advisory Council sa Malacanang kanina. Dinaluhan ang pagpupulong nina Senate President Juan Ponce-Enrile at Speaker Feliciano Belmonte at mga pinuno ng iba't ibang tanggapan ng pamahalaan.
Kabilang sa mga hinihiling ni Pangulong Aquino sa mga mambabatas ay ang pagsusog sa Human Security Act of 2007, pagsusog sa batas na sumasaklaw sa People's Television Network, pagsusog sa Rural Electrification Program, pagsasa-ayos ng Excise Tax sa Alcohol at Tobacco products, at panukalang batas para sa pagsasaayos ng hangganan ng mga kagubatan sa public domain at pagbibigay ng higit na proteksyon para sa mga mananaid o consumers.
Hiniling din ni Pangulong Aquino ang pagsasa-ayos ng mga batas na magsasanggalang sa individual personal data sa information at communications systems sa pamahalaan at maging sa pribadong sektor.
Ayon sa Tanggapan ng Pangulo, hiniling din ni Pangulong Aquino ang pagbalasa sa Philippine Statistical System, at paggagawad ng mas mabigat na parusa sa pagnanakaw o pagsira sa government risk reduction and preparedness equipment, accessories at iba pang kagamitan.
Kailangan din umano ang pagbibigay ng dagdag na benepisyo at proteksyon para sa mga kasambahay at pagpapalawak ng coverage ng Science and Technology Scholarship Program at pagsusog sa Republic Act No. 7279 o Twenty Percent Balanced Housing at ang pinaka-kontrobersyal ay ang Responsible Parenthood, Reproductive Health, and Population and Development.
Nagpaabot naman ng kanyang kalungkutan si Cebu Archbishop Jose S. Palma sa pagsusulong ni Pangulong Aquino ng Responsible Parenthood, Reproductive Health, and Population and Development bill na tinututulan ng Simbahan.
Comments
Nagbabagang Paksa
Kompetisyon ng Talento at Kakayahan para sa mga Tagasubaybay sa Buong Daigdig
