Makabagong kagamitan para sa coast guard, tiniyak

Sa pagdiriwang ng Philippine Coast Guard ng kanilang ika-110 taon ng pagkakatatag, tiniyak ni Pangulong Benigno Simeon C. Aquino III na magkakaroon ng makabagong kagamitan at kakayahan ang mga opisyal at tauhan nito.

Ito ang buod ng kanyang mensahe sa ginawang pagdiriwang sa punong himpilan ng Philippine Coast Guard kaninang umaga.

Ayon kay Pangulong Aquino, obligasyon ng mga tauhan ng Tanog Baybayin ng Pilipinas na itaguyod ang seguridad at proteksyon ng mga mamamayan sa panahon ng kalamidad at sakuna. Tinawagan niya ang mga tauhan ng coast guard na manatiling tagapagligtas ng bayan maging sa gitna ng karagatan o sa kapatagan sapagkat kabilang sila sa takbuhan ng mga mamamayan.

Magiging doble-kayod umano ang kanyang administrasyon sa pagtugon sa mga pangangailangan ng Philippine Coast Guard.

Mula sa temang "Para sa Ligtas, Malinis at Mapayapang Karagatan Tungo sa Maunlad na Bayan," dumalo rin sa pagdiriwang sina Transport and Communications Secretary Manuel Araneta Roxas II, Armed Forces Chief of Staff General Eduardo Oban, Philippine National Police Chief Director General Nicanor Bartolome at mga kinatawan ng iba't ibang pamahalaan.

Pinamumunuan ni Admiral Ramon Liwag ang Philipine Coast Guard na mayroong humigit-kumulang sa 4,000 mga tauhan.

MGA AMBASSADOR NG EUROPEAN UNION, DUMALAW SA PAMPANGA

NAGMASID at nakipag-usap sa mga naging biktima ng malubhang pagbaha sa Gitnang Luzon sina European Union Ambassador to the Philippines Guy Ledoux at Finnish Ambassador Heikki Hannikainen sa Barangay Sta. Monica, San Simon, Pampanga kaninang umaga.

Nakita ko ang daan-daang mga mamamayang naglilinis ng ilog sa Barangay Sta. Monica at nag-aalis ng mga water lily na dahilan ng pagtaas ng tubig baha sa kanilang pook.

Ayon kay Ambassador Ledoux, ito ang isang paraan ng kanilang pakikiisa sa mga naging biktima ng trahedya sa magkakasunod na bagyong tumama sa lalawigan. Mayroon silang "food-for-work" program na malaki ang maitutulong sa paglilinis ng mga padaluyan ng tubig.

Sa bawat taong tutulong sa pag-aalis ng mga water lily sa mga ilog, bibigyan sila ng kaukulang pagkain. Binibigyan sila ng bigas bilang kapalit ng kanilang paglilinis ng mga sapa at ilog sa lalawigan.

Sa aking panayam kay Ambassador Ledoux, binanggit niyang mayroon nang P 12 milyon o 200,000 Euro na halaga ng emergency response assistance sa may 10,000 pamilya ang kanilang naipamahagi.

Namahagi rin sila ng relief goods na nagkakahalaga ng P600.00 bawat isa sa mga nasalanta ng bagyong "Pedring" at "Quiel."

Unang bahagi pa lamang ito sapagkat magkakaroon sila ng mobile clinics at kaukulang suporta sa mga health structure, pagbibigay ng tubig na maiinom, mga palikuran at magtuturo din sila ng mga paraan upang magkaroon ng epektibong waste management at hygiene promotion. Kabilang din sa kanilang palatuntunan ang emergency livelihood tulad ng cash-for-work at food-for-work.

PAGBUO NG ASEAN CENTER FOR EMERGENCY RESPONSE KAILANGAN

SAPAGKAT madalas tamaan ng mga kalamidad ang iba't ibang pook sa mga bansang nasa timog silangang Asya, kailangan na marahil ang pagbuo ng Center for Emergency Response sa mga kabilang sa Association of South East Asian Nations.

Ito ang panukala ni Ginoong Mathias Eick, Southeast Asian regional information officer ng European Commission Humanitarian and Civil Protection Department matapos dumalaw ang grupo ni European Union Head Delegate Guy Ledoux and Finnish Ambassador Heikki Hannikainen sa mga binahang pook ng Pampanga kaninang umaga.

Ipinaliwanag ni Ginoong Eick na nangunguna ang Pilipinas sa larangan ng disaster response sa mga kalapit-bansa sa ASEAN at malaki ang magagawa ng mga bansa kung magsasama-sama at magtutulungan.

Ani Ginoong Eick, tulad ng karanasan nila sa Europa, kung mayroong malaking sunog sa kagubatan sa isang bansa, nagpapahiram ng mga eroplanong lilipad at magdadala ng tubig sa mga pook na may apoy.

Ang Center for Emergency Response ay magiging tanggapan na makikipag-ugnayan sa iba't ibang bansa na mangangailangan ng tulong.