|
||||||||
|
||
MULA sa Lungsod ng Cotabato, nagkasagupa ang magkalabang paksyon ng Moro Islamic Liberation Front sa loob ng tatlong oras sa Mamasapano sa Maguindanao kahapon at 'di pa mabatid ang bilang ng mga nasawi o nasugatan sa magkabilang panig.
Ayon kay Colonel Mayoralgo dela Cruz, pinuno ng First Mechanized Infantry Brigade, ang sagupaan ay nagsimula mga ikatlo ng hapon sa pag-itan nina MILF field commander Adan at ng breakaway group ni Ameril Umra Kato.
Tuloy pa rin umano ang pagsisiyasat, ayon kay Colonel dela Cruz.
Ayon sa grupo ni Adan, hinahabol nila ang mga pinaghihinalaang sangkot sa Maguindanao massacre, na karamiha'y mga militiamen na kabilang sa Civilian Volunteers Organization na maganap ang sagupaan.
Subalit ayon kay Abu Misri Mama, taga-pagsalita ng Bangsamoro Islamic Freedom Movement na pinamumunuan ni Umra Kato, naganap ang sagupaan ng isang nagngangalang Banarin Ampatuan, apo ni Andal Ampatuan Sr., isang suspect sa 2009 Maguindanao massacre na suportado ni Adan, ang nagtangkang kumuha sa isang lupaing binili umano ng mga Ampatuan noong sila'y nasa poder pa.
Ayon kay Mama, ang BIFM ay dumating upang ipagtanggol ang interes ng tunay na may-ari ng lupain na nagsabing pwersahang sinamsam ang kanilang ari-arian ng mga Ampatuan. Tumanggi naman ang liderato ng MILF sa pagkakasangkot ng grupo ni Adan, ang 106th Base Command fighters sa panig ng mga Ampatuan.
Marapat umanong magsiyasat upang maiwasan ang mga sapantaha tungkol sa insidente. Ito naman ang pahayag ni MILF political affairs vice chairman Ghadzali Jaafar.
© China Radio International.CRI. All Rights Reserved. 16A Shijingshan Road, Beijing, China. 100040 |