Idinaos kahapon sa Hawaii ang ika-19 na di-pormal na pulong ng Asia-Pacific Economic Cooperation (APEC). Ipinahayag nang araw ring iyon ni Ma Zhaoxu, tagapagsalita ng delegasyong Tsino, na salamat sa magkakasamang pagsisikap at pantay na pagsasanggunian ng iba't ibang kasapi, natamo ng pulong ang pragmatiko at balanseng bunga na nagpapakita ng prinsipyo ng APEC.
Ipinahayag ni Ma na sa palagay ng panig Tsino, ang natamong bunga ng pulong ay nagpapakita ng 4 na aspektong kinabibilangan ng pagpapalalim ng integrasyon ng kabuhayang panrehiyon at pagpapalawak ng kalakalan, pagpapasulong ng green growth, seguridad sa enerhiya at pagbalangkas ng kooperasyon. Maraming komong palagay ang narating sa pulong sa aspekto ng patakaran ng inobasyon at pagpapaunlad ng mga katamtamang-laki at maliliit na bahay-kalakal, at nagkasundo ang mga kalahok sa pagtutol sa proteksyonismong pangkalakalan. Napagtibay din sa pulong ang "Pahayag ng mga Lider ng APEC Hinggil sa Produktong Pangkapaligiran at Kalakalang Panserbisyo at Pamumuhunan."
Idinagdag pa niya na sa mula't mula pa'y pinahahalagahan na at aktibong nilalahukan ng panig Tsino ang kooperasyon ng APEC sa iba't ibang larangan. Nakahanda aniya ang Tsina na magsikap kasama ng iba't ibang kasapi para patuloy na mapasulong ang proseso ng pagkakalaya at pagkakaginhawa ng kalakalan at pamumuhunan sa rehiyong Asya-Pasipiko at makapagbigay ng ambag para sa pagsasakatuparan ng berde at sustenableng pag-unlad ng rehiyong Asya-Pasipiko at buong daigdig.
Salin: Li Feng
