Migrant workers, paksa ng labor ministers ng Asia

ANG mga manggagawang mula sa iba't ibang bansa ang sentro ng pagpupulong ng mga ministro ng paggawa mula sa 19 na bansang nasa Asia at Gitnang Silangan mula bukas hanggang sa Huwebes. Magkakaroon din ng higit na pakikipag-usap sa mga kabilang sa civil society.

Ito ang ibinalita ng Migrant Forum Asia at Human Rights Watch ngayon. Ang pagpupulong ay bahagi ng naunang pagpupulong na pinamagatang Abu Dhabi Dialogue, na isang inter-regional consultation sa pagitan ng mga bansang nagpapadala ng mga manggagawa at mga bansang tumatanggap ng migrant workers.

Bagama't hindi inanyayahang lumahok ang civil society groups, magkakaroon sila ng kasabay na consultation process.

Ayon kay William Gois, regional coordinator ng Migrant Forum in Asia, isang samahan ng higit sa 200 migrants' rights groups sa Asia, mahalaga ang pagtutulungan ng iba't ibang bansa upang mapataas ang antas ng mga karapatan ng manggagawa. Nais din nilang malaman kung ano ang tunay na nagaganap at maging bahagi ng proseso.

Paguusapan nila ang nilalaman ng 2012 Framework of Regional Collaboration of the Abu Dhabi Dialogue na titiyak sa pagkakaroon ng pagkilala sa domestic, bilateral at multilateral measures para higit na makinabang ang mga manggagawa ng nangingibang-bansa. Aalamin din ang pinakamagagandang ginagawa ng mga bansa at mga rekomendasyon sa recruitment, trabaho sa ibang bansa, paghahanda sa kanilang pag-uwi sa pinagmulang bansa at ang reintegration.

Mahalaga rin umano ang mgahakbang upang maiwasan ang pag-abuso at pagkakaroon ng mas magandang benepisyo mula sa migration. Susuriin din ang recruitment costs, bubuo ng pamantayan sa mga kontrata ng paggawa at ang pagpapanagot sa recruitment agencies para sa mga gawang local labor brokers.