Ipinalabas kahapon ng Tanggapan ng Impormasyon ng Konseho ng Estado ng Tsina ang White Paper sa patakaran sa enerhiya ng Tsina sa taong 2012. Ito ang ikalawang pagkakataon na nagpalabas ang Tsina ng dokumento sa enerhiya sa ngalan ng bansa.
Anang White Paper, patuloy na igigiit ng Tsina ang sustenableng pag-unlad ng enerhiya, ibayo pang palalakasin ang kooperasyong pandaigdig, at pagkontrol sa matinding gastos at malaking bolyum sa enerhiya. Binigyan-diin ng White Paper na "sa nakaraan man o sa hinaharap, ang Tsina ay hindi banta sa kaligtasan ng enerhiya sa buong daigdig." Nabanggit din sa White Paper ang pagpapabuti ng pamumuhay ng mga mamamayan, inobasyon sa teknolohiya, at pangangalaga sa kapaligiran.
Ipinahayag ni Ginang Shi Dan, isang dalubhasa ng Chinese Academy of Social Sciences o CASS, na ang naturang white paper ay nagsasalaysay sa kalagayan ng enerhiya at pagbabago ng patakarang pang-enerhiya ng Tsina. Aniya pa, ito rin ay naglalayong bawasan ang pagdududa at pagkabahala ng iba pang bansa sa mabilis na paglaki ng pangangailangang pang-enerhiya ng Tsina.
Sinabi niyang patuloy na igigiit ng Tsina ang nukleong ideya ng White Paper sa patakaran sa enerhiya noong 2007-unahin ang pagtitipid sa enerhiya. Dagdag pa ni Shi, mas mayaman ang mga hakbangin, at isasaalang-alang nang mas mabuti ang sustenableng pag-unlad ng pamumuhay ng mga mamamayan, lipunan, at kabuhayan.
Anang White Paper, sa hinaharap, nasa yugto ng mabilis na pag-unlad pa rin ang pagsasaindustrya at pagsasalunsod ng Tsina at patuloy na lalaki ang pangangailangang pang-enerhiya.
Ipinahayag naman ng White Paper na igigiit ng Tsina ang pagbubukas sa labas, at patuloy na pabubutihin ang kapaligiran ng pamumuhunang dayuhan. Hinimok ng Tsina na lutasin ang mga pandaigdigang isyung pang-enerhiya sa pamamagitan ng diyalogo at pagsasanggunian, sa halip ng pamumulitika at karahasan.
