MARAMING SAKUNA DAHILAN SA HUMAN ERROR AT KAPABAYAAN. Ito ang sinabi ni Engr. Bert Suansing, Secretary General ng Philippine Global Road Safety Partnership sa isinagawang paggunita sa mga nasawi, nasugatan at nabalda. Umaabot sa 34 katao ang nasasawi bawat araw sa Pilipinas dahilan sa mga sakuna sa lansangan
IDINAOS kahapon ng umaga ang isang Misa sa gumunita sa mga naging biktima ng mga sakuna, hindi lamang sa Pilipinas kungdi sa buong daigdig. Sa isang panayam, sinabi ni Engr. Bert Suansing, Secretary General ng Philippine Global Road Safety Partnership na ang kanilang pagkilos sa Pilipinas ay pakikiisa sa World Day of Remembrance na isinasagawa sa tuwing ikatlong Linggo ng Nobyembre.
Kabilang din sa mga ipinananalangin ang mga naging biktimang nasugatan at nabalda. Hindi umano kapalaran ang maging biktima ng sakuna sapagkat nagkaroon ng kapabayaan at paglabag sa mga alituntunin ang mga tsuper at iba pang mga tao.
May kinalaman ito sa pag-uugali ng mga taong nasa lansangan tulad ng mga pedestrian. Inihalimbawa niya ang mga taong ayaw gumamit ng pedestrian overpass at sinusubukan ang kalakhan ng Commonwealth Avenue upang magamit sa pagtawid.
Vehicle maintenance ang isa ring dahilan ng sakuna. Ang pagbabakasakali ang dahilan ng mga nasasawi. Mahalaga ring tingnan ang mga uri ng gulong ng mga sasakyan sapagkat may mga nag-aarimuhan o nagtitipid sa pag-aalaga ng sasakyan. Sa Pilipinas umano ay mayroong average na 34 katao ang nasasawi at nasusugatan sa bawat araw.
