Mga Tsinoy, magdiriwang ng Chinese New Year

Ulat Para sa Feb 9th

MGA TSINOY, MAGDIRIWANG NG CHINESE NEW YEAR

SINIMULAN na ng mga Tsinoy ang pagdiriwang ng Chinese New Year ngayong Sabado. Kaninang umaga, may mga pagtatanghal na sa Chinatown, sa Maynila.

Ang Pilipinas ang tahanan ng isang malaking komunidad ng mga Filipino-Chinese at may pagtataya na mayroong 20-25% ng mga mamamayan ang may dugong Tsino.

Nong nakalipas na taon, special non-working holiday ang pagdiriwang kaya nga lamang ay Linggo ang araw ng bagong taon kaya't walang special non-working holiday.

Ang Filipino-Chinese communities ang nagdiriwang ng Chinese Lunar New Year kada taon ng mayroong makukulay na parade sa iba't ibang lugar na kinikilalang Chinatown. May mga sumasayaw na lion at dragon upang magatawag ng kalusugan, talino ay kaunlaran. Ayon sa kinaugalian, naglilinis ng mga tahanan ang mga Tsinoy upang mawala ang masasamang espiritu.

Hindi nawawala ang mga lucky charm na inililigay sa mga tahanan, sasakyan at tahanan. May mga pulang sobre na kilala sa pangalang ang pao na nilalagyan sa salapi at naglalagay din ang mga Tsinoy ng iba't ibang prutas sa hapag-kainan upang maghatid ng swerte.

Isang katangi-tangi bahagi ng Chinese New Year ang pamamahagi ng tikoy o Chinese New Year pudding. Ipinagbibili ito sa mga tindahan mula Enero hanggang Pebrero at naglalaman ng malagkit na bigas, gawgaw mula sa trigo, asin, asukal at tubig. Ito ang simbolo ng pagkakaisa at malapit na pagkakaibigan.

Ayon kay Cua Hong Lam, isang iginagalang na kolumnista ng Chinese Commercial News, ang Chinese New Year ay isang sinaunang kaugalian na nagpapakita ng pagkakaisa ng pamilya, kaunlaran, pag-asa, pagbabago at pagdiriwang na rin ng tagtunaw ng niyebe.

Bumati rin si Chito Sta. Romana, isang bantog na mamamahayag, naglingkod bilang ABC Bureau Chief sa Beijing, sa lahat ng mga tagapakinig ng China Radio International – Filipino Service na nawa'y magkaroon ng isang mapayapa at maunlad na Chinese New Year.

Dalangin naman ni Dr. Francis Chua, dating pangulo ng Federation of Filipino Chinese Chambers of Commerce and Industry Inc. at PCCI na harinawang ang Year of the Snake ay magdulot ng kapayapaan at pagkakasundo sa buong Asia at magtulungan ang mga pinuno ng iba't ibang bansa upang mai-angat ang mahihirap sa kanilang kinasasadlakang kalagayan.

Sa Lungsod ng Cotabato, nagsimula na rin ang ikatlong pagdiriwang ng Chinese New Year sa City Plaza. Kasama ng City Tourism Council ang Cotabato City Institute upang magtanghal ng mga awitin at sayaw ng Tsino para pagdiriwang.

Sa ilalim ng pamumuno ni Mayor Japal J. Guiani, Jr., makakasama sa pagdiriwang ang Filipino-Chinese Chamber of Commerce and Industry, Liga ng mga Barangay, Philippine Marines and Philippine National Police sa Chinese New Year celebrations.

Ganap na ikatlo ng hapon kanina sinimulan ang pagdiriwang.

Mga sikat na pook sa Kamaynilaan tulad ng five-star entertainment centers noon pang isang Sabado sinimulan ang pagdiriwang tulad ng paggamit ng mga paputok upang magkaroon ng magandang bagong taon. Nagkaroon na rin ng espesyal na dragon dances, Wushu demonstration at yo-yo exhibition. Ang mga bantog na lion dancers mula sa Kung Seng Keng ng Malaysia ay kinagulatan din ng mga manonood.

PAGBABAGO NG SALIGANG BATAS, MAKAPAGHIHINTAY

MAKAPAGHIHINTAY ang pagbabago ng Saligang Batas. Sinabi ni Pangalawang Pangulong Jejomar C. Binay sa kanyang talumpati sa harap ng Philippine Constitution Association (PHILCONSA) na higit na kailangang maunawaan ng mga mamamayan kung ano ang kahulugan ng Saligang Batas sa bansa at sa mga mamamayan.

Isang mahalagang isyu ang pagbabago nito at nararapat munang pag-aralan ito ng lahat. Kahapon ipinagdiwang ang Philippine Constitution Day sa Makati.

Ang Saligang Batas ay nararapat lamang igalang at masunod ang nilalaman nito sa kapakinabangan ng sambayanan.

Ang alinmang pagbabago sa Saligang Batas ay nararapat nakatuon sa pagpapalakas ng ekonomiya at matugunan ang pangangailangan ng mga mamamayan.

Nanawagan din siya sa mga kasapi ng PHILCONSA na tumulong sa pagsusulong ng mga pag-aaral at pagtalakay sa mga isyung may kinalaman sa Saligang Batas upang higit na maliwanagan ang mga mamamayan.

PAGTUTULUNGAN NG PAMAHALAAN AT MILF NAKIKITA NA

SINABI ni Cabinet Secretary Jose Rene Almendras na nakikita na ang magandang pagtutulungan ng pamahalaan at ng Moro Islamic Liebration Front sa pakilala ng mga makikinabang sa kasunduang pangkapayapaan at mga pangangailangan ng mga mamamayan sa ilalim ng Sajahatra Bangsamoro program.

Sa isang press conference sa Cotabato City, sinabi ni Kalihim Almendras na nararapat lamang ipagmalaki ang mga Filipino mula sa magkabilang-panig. Ang mga taong dati'y nagbabarilan ay magkakasama na sa iisang mesa at nag-uusap kung paano magkakaroon ng kapayapaan at kaunlaran. Nakikini-kinita na ang pagtatagumpay ng magkabilang-panig, dagdag pa niya.

Ang Sajahatra Bangsamoro ang naglalaman ng mga paraan ni Pangulong Benigno Simeon C. Aquino III na i-angat ang mga Muslim sa larangan ng kalusugan, edukasyon at kabuhayan ng mga kasapi ng Moro Islamic Liberation Front.

Ang palatuntunang ito ang ilulunsad sa Lunes, ika-11 ng Pebrero sa Bangsamoro Leadership and Management Institute compound sa Sultan Kudarat sa Maguindanao.

May pagtutulungan na ang pamahalaan at MILF sa pagkilala ng mga tutulungang mamamayan sa pamamagitan ng Department of Social Welfare and Development, Department of Health, PhilHealth, Department of Education, Commission on Higher Education, Department of Agriculture at Technical Education and Skills Development Authority.