Sinimulan kahapon ni Premyer Li Keqiang ng Tsina ang kanyang pagdalaw sa apat na bansang kinabibilangan ng India, Pakistan, Switzerland, at Alemanya. Ang India ang unang himpilan ng kasalukuyang biyahe ni Li, bagay na nagpapakita ng lubos na pagpapahalaga ng bagong pamahalaan ng Tsina sa relasyong Sino-Indian.
Bilang dalawang malaking umuunlad na bansa, kapuwa nahaharap ang Tsina at India sa realistikong tungkulin ng pagpapaunlad ng kabuhayan, at pagpapabuti ng pamumuhay ng mga mamamayan. Maliban sa kooperasyon, may kompetisyon din ang dalawang bansa, pero mas malaki kaysa kompetisyon ang kanilang kooperasyon, at kapansin-pansin ang benepisyong dulot nito.
Nitong nakalipas na ilang taon, natamo ng kooperasyong pangkabuhayan at pangkalakalan ng Tsina at India ang napakapositibong progreso. Noong unang dekada ng ika-21 siglo, lumaki nang halos 20 ulit ang kabuuang halaga ng bilateral na kalakalan ng kapuwa panig. Noong 2012, umabot sa 66.5 bilyong dolyares ang kabuuang halaga ng kalakalan ng dalawang bansa. Dahil dito, ang Tsina ay ang naging ika-2 pinakamalaking trade partner ng India, at ang India naman ay naging pinakamalaking trade partner ng Tsina sa Timog Asya.
Bukod dito, walang humpay na pinapalakas ng dalawang bansa ang kooperasyon sa mga suliraning pandaigdig. Sa ilalim ng mga mekanismo ng UN, G20, at BRICS, nagkokoordinahan ang kapuwa panig, para magkasamang harapin ang mga hamong pandaigdig na gaya ng pandaigdig na krisis na pinansiyal, pagbabago ng klima, enerhiya, paglaban sa terorismo, seguridad ng pagkaing-butil, at pangangalaga sa komong interes ng mga umuunlad na bansa.
Kahit nangingibabaw ang problema sa isyung panghanggahan, sa mula't mula pa'y nananatiling kontrolado ang isyung ito, batay sa simulain ng mapagkaibigang pagsasanggunian. Nagkakaroon ang kapuwa panig ng komong palagay sa isyu ng pangangalaga sa kapayapaan at kaligtasan ng purok-hanggahan, at kapuwa ipinalalagay nilang hindi dapat maapektuhan ng isyung panghanggahan ang pangkalahatang pag-unlad ng relasyon ng dalawang bansa.
Tiyak na mapapatibay ng kasalukuyang pagdalaw ni Premyer Li ang estratehiko't kooperatibong partnership ng Tsina at India, at ipagkakaloob ang lakas-panulak para sa kaunlaran at kasaganaan ng Asya, maging ng buong mundo.
