Dumating kahapon sa Port of Spain, kabisera ng Trinidad and Tobago, si Pangulong Xi Jinping ng Tsina, para pasimulan ang kanyang dalaw-pang-estado sa bansang ito.
Sa paliparan, ipinahayag ni Xi ang taos-pusong pangungumusta at mabuting hangarin sa mga mamamayan ng Trinidad and Tobago, sa ngalan ng mga mamamayang Tsino. Ipinahayag niyang ang Trinidad and Tobago ay isang mahalagang bansa sa rehiyon ng Caribbean. Aniya, ang pagpapatatag at pagpapaunlad ng relasyon ng dalawang bansa ay hindi lamang magdudulot ng benepisyo sa kani-kanilang mga mamamayan, kundi makakabuti rin sa pagpapasulong ng pagkakaisa at pagtutulungan ng Tsina at mga bansa sa rehiyong ito. Nagpahayag din siya ng pag-asang, sa kanyang pakikipagtagpo kina Pangulong Anthony Carmona at Punong Ministro Kamla Persad-Bissessar ng Trinidad and Tobago, magpapalitan sila ng palagay hinggil sa bilateral na relasyon at mga mahalagang isyung panrehiyon at pandaigdig.
Napag-alamang sa kanyang pananatili sa Port of Spain, makikipagtagpo rin si Xi sa mga lider ng mga iba pang bansa sa rehiyon ng Caribbean, para talakayin ang hinggil sa pagpapalakas ng kooperasyon at pagpapataas sa bagong lebel ng relasyong pangkaibigan at pangkooperasyon ng Tsina at mga bansang ito.
Salin: Liu Kai
