|
||||||||
|
||
Sa kanyang talumpati, ipinahayag ni Pangulong Xi na ang naturang pagdalaw niya sa Mexico ay naglalayong palalimin ang pagkakaibigan ng dalawang bansa, palawakin ang kooperasyon, at balangkasin, kasama ng mga lider ng Mexico, ang blueprint ng pag-unlad ng relasyon ng Tsina at Mexico.
Nauna rito, sa pag-uusap nina Pangulong Xi at Pangulong Enrique Peña Nieto ng Mexico, ipinatalastas ng mga lider ng dalawang bansa ang pag-aangat ng relasyon ng dalawang bansa sa komprehensibong estratehikong partnership. Para sa kapuwa Tsina at Mexico, ito ay isang bagong pagkakataon ng pag-unlad, at ito ay makakabuti rin sa maayos na paglutas ng mga kahirapan sa relasyon ng dalawang bansa. Halimbawa, sa mula't mula pa'y, isyu na ang trade deficit na hadlang sa pagitan ng Tsina at Mexico. Hinggil dito, ipinahayag ni Pangulong Xi sa kanyang talumpati na nakahanda ang Tsina na mapanatili ang bukas na pakikitungo, lutasin ang mga kahirapan sa pamamagitan ng diyalogo, para pasulungin ang magkasamang pag-unlad, at likhain ang mainam na kapaligiran para sa pagpapalawak ng bilateral na kooperasyong pangkabuhayan at pangkalakalan.
Bukod sa kooperasyong pangkabuhayan at pangkalakalan, ang pagpapalitang di-pampamahalaan ng Tsina at Mexico ay naging isang mahalagang tulay ng pagpapalitan ng dalawang bansa. Ipinahayag ni Pangulong Xi na ang pagkakaibigan sa pagitan ng mga mamamayan ng dalawang bansa ay puwersang tagapagpasulong ng pangmatagalang pag-unlad ng relasyon ng dalawang bansa, at dapat walang humpay na palawakin ang pagpapalitan ng mga mamamayan ng dalawang panig sa iba't ibang larangan para lalo pang pasulungin ang pagkakaibigan ng Tsina at Mexico.
Ang Mexico ay mahalagang bansa sa rehiyong Latin-Amerika. Ang mainam na pag-unlad ng relasyon ng Tsina at Mexico ay maaaring magsulong ng pag-unlad ng relasyon ng Tsina at mga bansang Latin-Amerikano. Sa kanyang talumpati, inilahad rin ni Pangulong Xi ang kinabukasan ng pag-unlad ng relasyon ng Tsina at mga bansang Latin-Amerikano. Ipinalalagay niyang sa larangang pulitikal, dapat igalang at katigan ng isa't isa ang mga isyung may kinalaman ng nekleong kapakanan ng dalawang panig; sa larangang pangkabuhayan, dapat samantalahin ng Tsina at mga bansang Latin-Amerikano ang pagkakataon, para itatag ang pangmatagalan at matatag na pangkooperasyong relasyong pangkabuhayan at pangkalakalan; sa larangang kultural, dapat palakasin ng dalawang panig ang diyalogo at pagpapalitan.
Salin:Sarah
© China Radio International.CRI. All Rights Reserved. 16A Shijingshan Road, Beijing, China. 100040 |