Nakipag-usap dito sa Beijing kahapon si Pangulong Xi Jinping ng Tsina kay Hamid Karzai, dumadalaw na Pangulo ng Afghanistan. Malalimang nagpalitan ng kuru-kuro ang dalawang lider hinggil sa bilateral na relasyon, kalagayan ng Afghanistan, at mga isyung panrehiyo't pandaigdig na kapuwa nila pinahahalagahan, at narating nila ang mahalagang komong palagay tungkol sa pagpapalalim ng estratehiko't kooperatibong partnership ng dalawang bansa.
Kaugnay ng pagpapaunlad ng relasyong Sino-Afghan, iniharap ni Xi ang sumusunod na limang mungkahi: Una, panatilihin ang pagpapalagayan sa mataas na antas at pagpapalitan ng mga pamahalaan, organong lehislatibo, at partido, palakasin ang estratehikong pag-uugnayan sa mahahalagang isyu, at pahigpitin ang pagtitiwalaang pulitikal. Ika-2, palakasin ang kooperasyon sa mga larangang gaya ng kabuhayan, kalakalan, nakontratang proyekto, paggagalugad ng yaman at enerhiya, konstruksyon ng imprastruktura at iba pa. Ika-3, palakasin ang kooperasyong panseguridad, at magkasamang bigyang-dagok ang "tatlong puwersa", pagpupuslit ng droga at transnasyonal na krimen. Ika-4, palawakin ang pagpapalitang kultural, at nakahanda ang Tsina na patuloy na magsanay ng iba't ibang uri ng talento para sa panig Afghan. At ika-5, palakasin ang pag-uugnayan at pagkokoordinahan sa balangkas ng UN at iba pa, at katigan ang pagpapatingkad ng Shanghai Cooperation Organization ng mas malaking papel sa isyu ng Afghanistan.
Binigyan-diin din ni Xi na kinakatigan ng Tsina ang pangangalaga ng panig Afghan sa pagsasarili, soberanya at kabuuan ng teritoryo ng bansa, at iginagalang ang pagpili ng mga mamamayang Afghan ng sariling landas ng pag-unlad batay sa aktuwal na kalagayan ng bansa. Kinakatigan din aniya ng kanyang bansa ang pagsasakatuparan ng matatag na transasyon ng Afghanistan, at pagpapabuti at pagpapaunlad ng relasyon sa ibang bansa sa rehiyong ito.
Ipinahayag naman ni Karzai na pinasasalamatan ng panig Afghan ang ibinigay na pag-unawa, paggalang, pagkatig at mahalagang papel ng panig Tsino sa isyu ng Afghanistan. Nakahanda aniyang palakasin ang kooperasyon ng dalawang bansa sa kabuhayan, kalakalan at kultura. Buong tatag na kinakatigan at kinokoordinahan ng panig Afghan ang pagbibigay-dagok ng panig Tsino sa teroristikong puwersa, para maigarantiya ang komong kaligtasan.
Salin: Vera
