Idaraos ang Ika-23 Summit ng ASEAN sa Brunei sa ika-9 hanggang ika-10 ng buwang ito. Sa panahong ito, idaraos din ang isang serye ng Summit ng 10+1, 10+3 at Silangang Asya, at lalahok sa mga summit ang mga lider ng 10 kasaping bansa ng ASEAN, Tsina, Hapon, at Timog Korea. Ipinalalagay ni Professor Kitti Prasirtsuk, Direktor ng Sentro ng Pananaliksik sa Silangang Asya ng Thammasat University ng Thailand na sa kasalukuyan, hindi maliwanag ang prospekt ng kabuhayang pandaigdig at patuloy naman lumalaki ang kabuhayan ng mga bagong ekonomiya sa Asya. Kaya, aniya, ang balanse ng mga lakas ng daigdig ay tumatagilid sa Asya. Ang ASEAN ay natatanging organisasyon ng integrasyon sa Asya, kaya, pinahahalagahan ng iba't ibang bansa ang papel nito bilang plataporma ng pagsasangunian, dagdag pa niya.
Dagdag ni Prasirtsuk, ang ASEAN ay maaaring maging "pivot" sa pagitan ng mga malaking bansa. Walang presyur sa platapormang ito, kaya, puwedeng talakayin ng iba't ibang panig ang mga isyung kanilang pinahahalagahan, kabilang na ang mga isyu ng ASEAN mismo.
Sinabi pa niyang may kompetisyon ang mga malaking bansa sa rehiyong ito, at ito ay isang "espadang may magkabilang talim" para sa ASEAN.
Aniya, dahil sa presensya ng mga malaking bansa sa rehiyon, may espasyo ang ASEAN para sa talastasan at pagpili. Samantala, dapat aniyang palalimin ng ASEAN ang integrasyon at magsalita sa isang tinig para mapalakas ang sariling kakayahan. Pero, kung sobrang mainit ang kompetisyon ng mga malaking bansa sa rehiyon, lalaki ang hamon ng pagiging di-matatag, at ito ay magdudulot ng negatibong epekto sa ASEAN.
salin:wle
