IPINARATING ng Tsina ang kanilang pakikiramay sa mga nasalanta ng bagyong "Haiyan" na kilala sa Pilipinas sa pangalang "Yolanda." Sa isang pahayag mula kay Chinese Foreign Minister Wang Yi, ipinarating ng mga Tsino ang pakikiisa sa mga naging biktima at mga naulila ng napakalaking trahedya.
Ipinarating ni Minister Wang ang pakikiramay kay Kalihim Albert F. del Rosario ng Ugnayang Panglabas sa tindi ng pinsalang idinulot ng napakalakas na bagyo noong Biyernes. Ang Red Cross Society of China ay nagbigay ng $ 100,000 bilang humanitarian aid upang mapag-ibayo ang relief efforts.
Ayon sa pahayag, magmamasid ang Tsina sa relief work at handang magbigay pa ng dagdag na suporta ayon sa pagsusuring gagawin. Umaasa ang mga Tsino na ang mga mamamayang apektado ng bagyo ay makalalampas sa matinding pagsubok, maibalik ang maayos na pamumuhay at maitayong muli ang kanilang mga tahanan sa pinakamadaling panahon.