"Yolanda," nakaapekto sa 13 milyong katao
NAGPAPATULOY ANG BUHAY. Makikita sa larawan ang batang karga ng kanyang ina sa labas ng Simbahan ng Ormoc. Humihiling ng lawa-lawa (cotton candy) ang bata. Puno ang simbahan ng mga mananampalataya kahit pa butas ang bubong ng simbahan at maraming tahanan ang nawasak ni "Yolanda." (Melo Acuna)
PAGLIKAS NG MGA MAMAMAYAN MULA SA LEYTE KARANIWAN. Halos lahat ng biyahe ng barko, fastcrafts at eroplano mula sa Leyte ay kakikitaan ng mga bata at ng kanilang mga magulang na patungo sa Cebu o Maynila upang pansamantalang manirahan sa mga kamag-anak. (Melo Acuna)
PATULOY na lumalaki ang bilang ng mga mamamayang apektado ni "Yolanda." Ayon sa Office for the Coordination of Humanitarian Affairs, tinataya ng pamahalaan na 13 milyong Pilipino ang apektado ng pinakamalakas na bagyong tumama sa bansa.
Sa pinakahuling ulat ng pamahalaan ng Pilipinas, higit na sa apat na milyong katao ang walang tahanan samantalang 392,470 ang naninirahan sa 1,587 evacuation centers sa Western at Eastern Visayan regions. Hirap pa ring puntahan ang mga liblib na pook.
Ang United Nations Humanitarian Air Service ay nagsimulang magdala at maghatid ng mga humanitarian staff at cargo. Tinatayang may 2.5 milyon ang nangangailangan ng pagkain. Nakapagbigay na ang United Nations at pamahalaan ng pagkain para sa 1.1 milyong biktima. Namahagi na ang pamahalaan ng 836,900 food packs. Mayroong 43 international medical teams ang dumadalo sa pangangailangan ng mga mamamayan sa Capiz, Cebu, Leyte at Eastern Samar.
1 2 3 4 5 6 7
