Nag-usap kahapon sa Macau sina Fernando Chui Sai On, Punong Ehektibo ng Macau, China, at Jose Manuel Durao Barroso, Tagapangulo ng Komisyon ng Unyong Europeo (EU), hinggil sa mga natamong bunga ng dalawang panig nitong nakaraang 20 taon at pagpapalalim ng kooperasyon sa mga larangan sa hinaharap.
Pinasalamatan ni Chui ang pagkatig ng EU sa pag-unlad ng Macau. Naniniwala siyang patuloy na palalalimin at palalawakin ng dalawang panig ang kooperasyon sa serbisyo ng abiyasyon, kultura, edukasyon, pangangalaga sa kapaligiran sa hinaharap.
Ipinahayag ni Barroso na nakahanda ang EU na pahigpitin, kasama ng Macau, ang kooperasyon sa batas, edukasyon, kultura, pangangalaga sa kapaligiran, at pagpapalitan ng mga talento. Naniniwala siyang sa pamamagitan ng ganitong mga kooperasyon, makakakuha ang dalawang panig ng win-win situation at mutuwal na kapakinabangan.
Inilahad ni Chui ang kalagayan ng pag-unlad ng Macau, mga kooperasyon sa ibang mga probinsya ng Tsina at mga plano ng pag-unlad sa hinaharap.
Interesado si Barroso sa mga hakbangin ng Macau sa pagpapaunlad ng kabuhayan at lipunan, at pagtugon sa mga hamon sa hinaharap.
Sinabi pa niya na dahil sa patakarang isang bansa dalawang sistema, may espesyal na katayuan ang Macau sa buong Tsina at dahil pa riyan, maaaring gampanan ng Macau ang mahalagang papel sa pag-unlad ng relasyon ng Tsina at EU.
