Nag-usap kahapon sa Beijing sina Premyer Li Keqiang ng Tsina at dumadalaw na Punong Ministro Jean-Marc Ayrault ng Pransya.
Ipinahayag ni Li na dapat patatagin ng Tsina at Pransya ang pagkakaibigan, palawakin ang kooperasyon, at palakasin ang koordinasyon sa mga suliraning panrehiyon at pandaigdig. Sinabi rin niyang ang susunod na taon ay ika-50 anibersaryo ng pagkakatatag ng relasyong diplomatiko ng Tsina at Pransya, at dapat samantalahin ng dalawang bansa ang pagkakataong ito, para mapasulong sa mas mataas na antas ang kanilang relasyon. Dagdag pa ni Li, pinahahalagahan ng Tsina ang relasyon sa Unyong Europeo (EU), at umaasa itong mapapatingkad ng Pransya ang positibong papel para sa malusog na pag-unlad ng relasyong pangkabuhayan at pangkalakalan ng Tsina at EU.
Ipinahayag naman ni Ayrault na nakahanda ang Pransya, kasama ng Tsina, na pahigpitin ang pagpapalagayan sa mataas na antas, palakasin ang pag-uugnayan, at panatilihin ang kooperasyon sa mga isyung panrehiyon at pandaigdig. Dagdag niya, dapat idaos nang buong husay ang mga aktibidad bilang pagdiriwang sa ika-50 anibersaryo ng pagkakatatag ng relasyong diplomatiko ng Pransya at Tsina, at ibayo pang palakasin ang pagpapalitan at pagtutulungan ng dalawang bansa. Sinabi rin ni Ayrault na pasusulungin ng Pransya ang pagtatamo ng mas maraming bunga ng kooperasyon ng EU at Tsina.
