Nanawagan kahapon si Liu Jieyi, Pirmihang Kinatawang Tsino sa UN, sa iba't ibang panig ng Ukraine na lutasin ang pagkakaiba sa paraan ng diyalogo para mapangalagaan ang kapayapaan at katatagan ng rehiyon.
Nagdaos kahapon ang UN Security Council ng pangkagipitang pulong hinggil sa situwasyon ng Ukraine. Sa kanyang talumpati, nagpahayag si Liu ng pagkabalisa ng panig Tsino sa kasalukuyang kalagayan ng Ukraine, at pagkondena sa mga karahasan na naganap kamakailan. Aniya, hinimok ng Tsina ang iba't ibang panig ng Ukraine na mapayapang lutasin ang pagkakaibang panloob sa loob ng balangkas ng batas, at totohanang pangalagaan ang legal na karapatan ng mga mamamayan, para mapanumbalik ang normal na kaayusan ng lipunan.
Salin: Andrea