Si Hong Lei, Tagapagsalita ng Ministring Panlabas ng Tsina
Bilang tugon sa isinumiteng memorial kahapon ng Pamahalaang Pilipino sa Arbitral Tribunal kaugnay ng isyu ng South China Sea (SCS), ipinahayag ni Hong Lei, Tagapagsalita ng Ministring Panlabas ng Tsina, na hindi ito tatanggapin ng kanyang bansa.
Ipinagdiinan ng tagapagsalitang Tsino na batay sa Declaration on the Conduct of Parties in the South China Sea (DOC) na nilagdaan ng Tsina at mga bansang ASEAN na kinabibilangan ng Pilipinas, sang-ayon ang mga signataryong bansa na lutasin ang alitang pandagat sa pamamagitan ng talastasan, sa pagitan ng mga may direktang kinalamang bansa. Mababasa rin aniya ang katulad na tadhana sa mga kasunduang narating ng Tsina at Pilipinas. Kailangan aniyang sumunod sa pangako ang Pilipinas.
Idinagdag ni Hong na ang alitan sa pagitan ng Tsina at Pilipinas hinggil sa isyu ng SCS ay may kinalaman sa soberanya sa ilang isla at reef, at sa delimitasyon sa hanggahang pandagat ng dalawang bansa. Kaugnay nito, nagpalabas ng pahayag ang Tsina noong 2006, batay sa UN Convention on the Law of the Sea (UNCLOS). Anang pahayag, hindi tatanggapin ng Tsina ang paglutas sa ganitong alitan, sa pamamagitan ng arbitrasyon. Ipinakikita nitong nababatay sa UNCLOS ang pagtanggi ng Tsina sa isinumiteng memorial ng Pilipinas para sa arbitrasyon.
Muling hinimok ng tagapagsalitang Tsino ang Pamahalaang Pilipino na bumalik sa hapag ng talastasanan at buong-higpit na tumalima DOC.
