|
||||||||
|
||
SEOUL, Timog Korea—Sa panahon ng idinaraos na pagdalaw ni Pangulong Xi Jinping ng Tsina, nagpalabas kahapon ang Tsina at Timog Korea ng isang Magkasanib na Pahayag.
Anang pahayag, sapul nang itatag ang relasyong diplomatiko ng Tsina at Timog Korea noong 1992, kinakitaan na ang relasyon ng dalawang bansa ng malaking pag-unlad sa iba't ibang larangan. Sa kasalukuyan, patungo ang dalawang bansa sa direksyon kung saan mapapayaman pa ang kanilang estratehikong partnership na pangkooperasyon.
Inulit din ng dalawang bansa ang kanilang pagtutol sa pagdedebelop ng sandatang nuklear sa Korean Peninsula. Anila, ang pagsasakatuparan ng walang-nuklear na Peninsula ay angkop sa interes ng lahat ng panig ng Six-Party Talks, at kailangang patuloy na magtalastasan ang anim na panig para malutas ang isyung nuklear ng Peninsula.
Muling ipinagdiinan din ng Tsina na iisa lang ang Tsina at ang Taiwan ay hindi maihihiwalay na bahagi ng Tsina. Ipinahayag naman ng Timog Korea ang pagkaunawa, paggalang at suporta sa nasabing paninindigan ng Tsina.
Sinimulan kahapon ni Pangulong Xi ang kanyang dalawang araw na pagdalaw sa Timog Korea. Noong 2013, dumalaw naman sa Tsina si Pangulong Park Geun-hye ng Timog Korea.
Salin: Jade
| ||||
© China Radio International.CRI. All Rights Reserved. 16A Shijingshan Road, Beijing, China. 100040 |