"Alinmang pag-atake na nakatuon sa mga sibilyan dahil sa ethnic background at religious belief ay itinuturing na krimen laban sa sangkatauhan, at dapat nitong isabalikat ang katugong responsibilidad." Ito ang ipinahayag kahapon ni Ban Ki-moon, Pangkalahatang Kalihim ng UN sa isang pahayag na inilabas ng kanyang tagapagsalita bilang pagkondena sa pamimilit ng Islamic State(IS), isang ekstrimistang organisasyon sa Irak, sa mga Kristiyano na umalis mula sa kanilang lupang tinubuan.
Binigyang diin ni Ban, na ibat-ibang armadong grupo na kinabibilangan ng IS ay dapat tumalima sa makataong batas ng daigdig at may obligasyon silang pangalagaan ang kaligtasan ng mga sibilyang namumuhay sa lupang kanilang kinokontrol.
Ipinahayag din ni Ban na patuloy na palalakasin ng UN ang pakikipagtulungan sa pamahalaan ng Irak para bigyan ng pangkagipitang tulong ang mga mamamayang Iraki, na kasalukuyang apektado ng sagupaan at bantang nagmumula sa mga grupong terorista.
Isang ultimatum ang idineklara kamakailan ng IS sa mga Kristiyano sa Mosul. Ayon sa ultimatum na ito, mayroong apat na pagpipilian ang mga Kristiyano bago ang ika-19 ng kasalukuyang buwan. Ang mga ito ay: pagbabayad ng buwis, pagpapalit ng pananampalataya, pagpatay at pag-alis sa kanilang tahanan. Kaya, tumakas sa Musol ang ilang daang pamilya ng mga Kristiyano.