Isang talastasan ang idinaraos ng Tsina at Amerika hinggil sa pagbalangkas ng code of conduct (COC) na may kinalaman sa seguridad na pandagat at panghimpapawid sa high seas, mula noong ika-25 hanggang ika-29 ng buwang ito.
Sa isang regular na preskon kahapon, ipinahayag ni Yang Yujun, Tagapagsalita ng Ministri ng Tanggulang-bansa ng Tsina na ang nasabing talastasan ay para matupad ang narating na komong palagay ng mga puno ng estado ng Tsina at Amerika noong nagdaang taon, kaugnay ng pagbalangkas ng nabanggit na COC at pagtatatag ng mekanismo ng pagpapaalam sa isa't isa hinggil sa kanilang mga pangunahing aksyong militar.
Idinagdag pa ni Yang na nitong ilang taong nakalipas, madalas na pumapasok ang mga eroplano at bapor ng hukbong Amerikano sa himpapawid at karagatan kung saan nagsasagawa ang Tsina ng pagsasanay-militar. Ipinagdiinan niyang delikado ang ganitong malapit na pagmamanman ng hukbong Amerikano, dahil di-inaasahan at walang pagpapaalam ang mga ito.
Inulit din ni Yang na laging tumatalima ang Tsina sa batas at praktis na pandaigdig sa pagsasagawa ng nasabing mga pagsasanay.
Salin: Jade