Idinaos kahapon dito sa Beijing ang ika-3 pulong ng mga puno ng pangkalahatang estado mayor ng hukbo ng mga kasaping bansa ng Shanghai Cooperation Organization (SCO).
Sa kanyang talumpati sa pulong, sinabi ni Fang Fenghui, Puno ng Pangkalahatang Estado Mayor ng People's Liberation Army ng Tsina, na pagkaraan ng 13 taong pag-unlad, ang SCO ay naging mabisang mekanismo at konstruktibong puwersa ng pagpapasulong ng pag-unlad ng mga kasaping bansa, at pangangalaga sa kapayapaan at katatagan ng rehiyon, maging ng buong mundo. Aniya, walang humpay na patataasin ng panig Tsino ang lebel ng kooperasyong pandepensa at pangkatiwasayan ng SCO.
Sinariwa at nilagom ng mga kalahok ang pag-unlad ng mga kasaping bansa sa larangan ng depensa at katiwasayan nitong nakalipas na ilang taon. Ikinasisiya nila ang natamong bunga ng kanilang kooperasyon, at nakahandang gumawa ng bagong pagsisikap para sa pagpapalalim ng kooperasyong pandepensa at pangkatiwasayan ng SCO.
Salin: Vera