Ang Ika-14 na Shanghai Cooperation Organization (SCO) Summit ay idaraos sa Dushanbe, kabisera ng Tajikistan, mula ika-11 hanggang ika-12 ng buwang ito.
Kaugnay ng mga pangunahing paksa sa gaganaping summit na may kinalaman sa relasyong Sino-Ruso, pagdaragdag ng bansang tagamasid ng SCO, prospek ng pagtutulungan ng organisasyon, pagbibigay-dagok sa terorismo, at Silk Road Economic Belt, humarap si Li Hui, Sugong Tsino sa Rusya sa mga media na Tsino para talakayin ang mga ito.
Kapuwa lalahok sa summit sina Pangulong Xi Jinping ng Tsina at Pangulong Vladimir Putin ng Rusya. Ito ay magiging ika-apat na pagtatagpo ng dalawang pangulo sa taong ito. Kaugnay nito, sinabi ni Li na magbabalik-tanaw ang dalawang puno ng estado sa mga natamong bunga sa pag-unlad ng relasyon ng Tsina at Rusya. Mag-uusap din sila kung paano ibayo pang pasusulungin ang pagtutulungan ng dalawang bansa sa kabuhaya't kalakalan, pamumuhunan, enerhiya, hay-tek, inobasyon, konstruksyon ng trans-border infrastructure, lalo na sa mga estratehikong proyekto. Umaasa ang dalawang bansa sa pamamagitan ng magkasamang pagsisikap, maisasakatuparan ang 200 bilyong dolyares na target na bilateral na kalakalan. Magpapalitan din sina Xi at Putin ng kuru-kuro hinggil sa mahahalagang isyung panrehiyon at pandaigdig.
Sinabi pa ng sugong Tsino na nitong 13 taong nakalipas sapul nang buuin ang SCO, nagsisilbi itong mabisang mekanismo at konstruktibong lakas sa pagpapasulong ng katatagang panrehiyon at magkakasamang pag-unlad ng mga kasaping bansa. Bilang bunga ng gaganaping summit, ilalabas ng mga kasaping bansa ang Deklarasyon ng Dushanbe at Press Release.
Susuriin din ng mga kasapi ang isang balangkas na proposal hinggil sa mga prosidyur ng pagdaragdag ng mga bansang tagamasid. Sa kasalukuyan, may limang bansang tagamasid ang SCO na kinabibilangan ng Iran, Pakistan, Afghanistan, Mongolia, at India. Mayroon din itong tatlong dialogue partner na kinabibilangan ng Sri Lanka, Belarus at Turkey.
Ang pagbibigay-dagok sa terorismo ay isa sa mga priyoridad ng pagtutulungan ng mga miyembro ng SCO. Ipinalalagay ng sugong Tsino na ang katatagan ng rehiyon ay nagsisilbing pinakapangunahing pundasyon para sa pagtutulungan ng mga kasaping bansa. Nitong ilang taong nakalipas, buong sikap na pinapatupad ng mga kasaping bansa ang mga dokumentong pangkooperasyon sa pakikibaka laban sa terorismo, ekstrimismo at separatism para mapangalagaan ang katatagan ng rehiyon. Katatapos lang ng Peace Mission 2014 Anti-terror Drill ng SCO. Ito ang ikalimang magkasanib na ensayo laban sa terorismo ng organisayong ito.
Kaugnay ng Silk Road Economic Belt na iminungkahi ni Pangulong Xi noong 2013, sinabi ng sugong Tsino na ito ay isang proposal na pangkapayapaan at pangkaunlaran at hindi ito entity. Nagtatampok ito sa pagiging bukas at inklusibo. Kasabay nito, ibabatay ng Silk Road Economic Belt ang bilateral at multilateral na mekanismong pangkooperasyon ng mga bansa sa kahabaan ng Silk Road.
Ang SCO ay binuo noong 2001 sa Shanghai at ang anim na miyembro nito ay kinabibilangan ng Tsina, Rusya, Kazakhstan, Kyrgyzstan, Tajikistan at Uzbekistan.
Salin: Jade
