Narating kahapon sa Berlin, kabisera ng Alemanya, ng Unyong Europeo (EU), Rusya, at Ukraine ang inisiyal na nagkakaisang posisyon hinggil sa isyu ng pagsuplay ng natural gas ng Rusya sa EU at Ukraine.
Sinabi ni Guenther Oettinger, Komisyoner ng EU na namamahala sa isyu ng enerhiya, na sumang-ayon ang tatlong panig sa paglagda ng isang pansamantalang kasunduan para maigarantiya ang pagsuplay ng Rusya ng natural gas sa darating na taglamig.
Ayon sa nasabing kasunduan, bago ang katapusan ng susunod na Oktubre, dapat bayaran ng Ukraine ang Rusya ng natitirang 2 bilyong dolyares na utang sa natural gas, pagkatapos nito, ihahatid ng Rusya ang 5 bilyong metro kubikong natural gas sa Ukraine. Bukod dito, dapat ibigay din ng Ukraine ang 1.1 bilyong dolyares na natitirang kabayaran sa Rusya bago ang katapusan ng taong ito.
Sinabi pa ni Oettinger na magtatagpo ang tatlong panig sa susunod na linggo para talakayin ang mga detalye ng kasunduan at lagdaan ito.
Sinabi ni Alexander Novak, Ministro ng Enerhiya ng Rusya, na ang naturang pansamantalang kasunduan ay tatagal ng anim na buwan.
Sinabi naman ni Yuri Prodan, Ministro ng Enerhiya at Karbon ng Ukraine, na sumang-ayon ang kanyang bansa sa pagbibigay ng natitirang kabayaran sa Rusya, pero dapat ipangako ng Rusya ang pagsuplay ng sapat na natural gas sa kanyang bansa.
