Binuksan kahapon sa Tokyo ang Ika-10 Beijing-Tokyo Forum na may temang "Pagtatatag ng Kapayapaan sa Hilagang-silangang Asya at Responsibilidad ng Tsina at Hapon—Pagtagumpayan ang Kahirapan sa pamamagitan ng Diyalogo."
Mayroon din itong apat na sub-forum na may kinalaman sa pulitika, kabuhayan, diplomasya at kaligtasan, at media.
Mahigit 500 kinatawang Tsino at Hapones mula sa iba't ibang sektor ng dalawang bansa ang kalahok sa porum.
Sa seremonya ng pagbubukas, sinabi ni Fumio Kishida, Ministrong Panlabas ng Hapon na malaking impluwensiya sa opinyong publiko ang media kaya mahalaga ang katuturan ng porum bilang plataporma ng pagpapalitan ng matataas na opisyal at media ng Tsina at Hapon.
Sinabi ni Cai Mingzhao, Puno ng Tanggapan ng Impormasyon ng Konseho ng Estado o Gabinete ng Tsina, na dahil tinanggihang kilalanin ng puwersang makakanan ng Hapon ang kasaysayang mapanalakay ng bansa, nasasadlak sa deadlock ang relasyong Sino-Hapones. Sa kabila nito, ipinagdiinan niyang kailangang ihiwalay ang mga militaristang Hapones at karaniwang mamamayang Hapones. Ang hindi paglimot sa kasaysayan ay hindi nangangahulungang pagpapatuloy ng pagkapoot, sa halip, ang kasaysayan ay kailangang gawing salamin at tumuon sa hinaharap.
Ang taunang porum na itinatag noong 2005 ay nasa magkakasamang pagtataguyod ng China Daily, pinakamalaking pahayagang Ingles ng Tsina at Genron NPO, isang think tank ng Hapon.
Salin: Jade
