|
||||||||
|
||
SINABI ni Dr. Julie Lynn Hall, country representative ng World Health Organization na kahit umuuwi na sa kanilang mga bansa ang mga manggagamot at narses na naglingkod sa binagyong bahagi ng Pilipinas at bumababa na ang mga donasyon mula sa ibang bansa, lumalakas naman ang paggasta ng pamahalaan ng Pilipinas upang maayos ang mga napinsalang bahagi ng Central Philippines.
Sa isang media briefing, sinabi ni Dr. Hall na nakadalo ang mga manggagamot na Filipino at banyaga sa may 200,000 konsultasyon at pag-oopera sa may 5,000 katao. Nakapagbakuna rin sila ng may 300,000 mga aso.
Ikinagalak ni Dr. Hall na ibalitang walang anumang disease outbreak na naganap sa binagyong pook mula noong nakalipas na Nobyembre. Isa umanong magandang pangyayari ang karanasan nila.
Isang malaking hamon sa kanila ang pagkapinsala ng mga pagamutan at kawalan ng kuryente para sa mga bakunang nasa refrigerator. Matapos ang anim na linggo, umabot sa 600,000 ang kanilang nabakunahan. Problema ang kawalan ng pag-iimbakan ng mga bakuna. Mabuti na lamang at nagkaroon ng follow-up na pagbabakuna sa buong bansa ang Kagawaran ng Kalusugan.
Ibinalita rin niya ang pagsilang ng may 180,000 mga sanggol mula ng tumama ang bagyong"Yolanda."
Tiniyak ni Dr. Hall na magkakaroon ng mas matitibay na mga gusali sa mga pagamutan sapagkat ayon sa disenyo ng Pilipinas, ang mga pagamutan ang nararapat maging command centers sa pagsapit ng bagyo, lindol at iba pang kalamidad.
Nakaipon umano ang World Health Organization ng US$ 17 milyon mula sa mga bansang Australia, Canada, Japan, Kuwait, Monaco, Norway, Korea, Russia, United Kingdom, Danish government at maging ang Central Emergency Fund ng United Nations, Japanese Kindergarten Association at Global Alert Network at mga non-government organizations.
Nababahala sila sa pagtatayang mayroong 800,000 kataong binagyo ang mayroong pagkabalisa at pagluluksa na mangangailangan ng mga magpoproseso. Sa bilang na ito, may 80,000 ang mangangailangan ng anti-depressants at anti-schizophrenic medicines.
Marami pa umanong mga taong nagluluksa at 'di pa nakakabawi sa kanilang karanasang sinapit.
© China Radio International.CRI. All Rights Reserved. 16A Shijingshan Road, Beijing, China. 100040 |