BEIJING, Xinhua – Pinapasulong ngayon ng mga departamentong pandepensa ng Tsina at Hapon ang pagsasanggunian ng mga dalubhasa para mapanumbalik ang mekanismo ng ugnayang pandagat ng dalawang bansa.
Ipinahayag ni Yang Yujun, Tagapagsalita ng Ministring Pandepensa ng Tsina sa buwanang regular na preskon na kailangang magsagawa ang Hapon ng konkretong aksyon para makalikha ng magandang kondisyon para sa pagpapabuti ng relasyong Sino-Hapones. Sinabi pa ni Yang na noong nagdaang Setyembre lamang, muli na namang sinimulan ng Tsina at Hapon ang konsultasyong pandagat sa mataas na antas.
Sa isang pulong nitong nagdaang Setyembre, sa Qingdao, siyudad ng lalawigang Shandong sa dakong silangan ng Tsina, tinalakay ng mga opisyal ng Tsina at Hapon ang hinggil sa isyu ng East China Sea at pagtutulungang pandagat. Napagkasunduan din nila, sa prinsipyo, na panumbalikin ang ugnayang pandagat ng dalawang bansa.
Nang magkomento sa pagsasanay militar ng Hapon kasama ang Estados Unidos, Pilipinas at Rusya, ipinahayag ni Yang ang kanyang pag-asang makakatulong ang nasabing mga kooperasyong militar ng Hapon at iba pang mga bansa sa kapayapaan at katatagan ng rehiyon, sa halip ng baligtad na resulta.
Salin: Jade