SA ikalimang taong anibesaryo ng Maguindanao Massacre, sinabi ng Foreign Correspondents Association of the Philippines na nagpapatuloy pa rin ang kawalan ng kaparusahan sa mga may kagagawan ng karumal-dumal na krimen laban sa sangkatauhan.
Magugunitang 32 mga manggagawa sa media ang napaslang sa isang maramihang pagpatay o masaker at hindi lahat ng mga pinaghihinalaan ay nadakip. Samantalang nabasahan nan g sakdal ang pinaniniwalaang utak ng krimen, wala pang paglilitis na nagaganap sapagkat tanging petitions for bail pa lamang ang nagaganap sa mga hukuman.
Hindi rin matutukan ng mga taga-media ang paglilitis sapagkat pinagbabawalan pa ng pulisya na itinanggi naman ng hukom na sa kanyang nagmula ang kautusan.
Pagkakataon na umano ng pamahalaang Aquino na patunayan ang pagkakaiba ng kanyang liderato sa kanyang hinalinhan subalit nakita kung gaano kabagal umikot ang gulong ng katarungan kahit pa minamasdan ng nakararami ang usapin.
Nanawagan ang samahan ng mga mamahayag na kumakatawan sa iba't ibang ahensya sa buong daigdig na panindigan ni Pangulong Aquino ang ala-alang iniwan ng kanyang mga magulang na nagpahalaga sa kalayaan ng pamamahayag, na tiyaking madarakip at maparurusahan ang kahat ng may kagagawan sa pag-uutos sa Philippine National Police na tiyakin, at hindi pagbawalan ang full-media coverage ng paglilitis ayon sa mga alituntuning itinatadaha ng hukuman.
