PUNO ng lump sums ang hinihiling na dagdag sa budget ng 2014 na nagkakahalaga ng P 23 bilyon. Mula ito sa panukala ng Department of Budget and Managemet para sa post-Yolanda rehabilitation at paghahanda ng Pilipinas para sa 2015 Asia-Pacific Economic Cooperation Summit.
Ito ang inilabas na impormasyon ng Social Watch Philippines. Ikinagulat ng grupo ang pagkakaroon ng P16.4 bilyon para sa "New Urgent Projects/Programs" para sa Yolanda reconstruction at APEC Summit na mayroong P 5.08 para sa mga proyektong nauna ng sinangayunan subalit hindi kaagad naipatupad at karagdagang P 1.8 bilyon para sa mga babayaran mula sa infrastructure projects ng Department of Public Works and Highways.
Sinabi ni Professor Leonor Briones na napakalabo ng breakdown sapagkat walang detalyes at maaaring mapakialaman.
Nakapasa na umano sa Senado ang 2015 budget at nakagugulat na magtatapos na ang taon ay may isinusulong na supplemental budget pa ang Department of Budget and Management para sa taong 2014. Ipinagtatanong pa ni Professor Briones kung magagastos ba ang malaking halaga sa loob ng isang buwan.
Kabilang sa supplemental budget ang mga nakalaan para sa rehabilitasyon ng LRT lines 1 at 2 at ang pagtatayo ng mga matitibay na pabahay para sa mga biktima ni "Yolanda." Ang mga halagang ito ay 'di naman nakasama sa supplemental budget.
