Isang maagang pamasko ang inihandog ng Pasuguan ng Pilipinas sa Beijing kahapon sa Peking University (PKU) School of Foreign Languages Library. Sa isang simple ngunit makabuluhang seremonya ibinigay bilang donasyon ni H.E. Ambassador Erlinda F. Basilio ang ilang mga aklat tungkol sa Pilipinas sa nasabing aklatan.
Sa kaniyang pahayag, sinabi ni Ambassador Basilio na siya ay matamang naniniwala sa habang-buhay na pagkalap ng kaalaman at ang pagbabasa ay pinaka mainam na paraan para maunawaan ang mga bagay sa buong mundo. Aniya ang mga aklat na alay sa PKU ay likha ng mga tinitingala at premyadong manunulat ng Pilipinas at inaasahan niyang ang mga ito ay makakatulong upang higit na mapalalim ang kaalaman hinggil sa bansa at mga mamamayan nito. Dagdag ng Embahador na Pilipino, sa June 9, 2015 ipagdiriwang ang ika 40 anibersaryo ng relasyong Sino-Pilipino at kanyang inaasahan na mas magiging malapit pa ang ugnayang ito sa susunod na 40 taon.
Si Ambassador Erlinda Basilio (kaliwa) at si Prof. Li Yansong, Vice President ng PKU
Ipinahayag naman ni Prof. Li Yansong, Vice President ng PKU ang pasasalamat sa ngalan ng pamantasan. Sinabi niya na ang PKU at ang Pasuguan ay may matingkad na papel sa pagpapalitang pang-edukasyon at kultura ng dalawang bansa. Ibinahagi niyang ang kauna-unahang book donation ng pasuguan ay naganap noong 2011 at ito'y nagpapatuloy hanggang sa kasalukuyan. Ang mga aklat ay nagagamit ng mga mag-aaral, guro at iba pang indibidwal na may interes sa Pilipinas. Hangad niya na ang ganitong programa ay patuloy na lalago kasabay ng pag-unlad ng pagkakaibigang Sino-Pilipino sa hinaharap.
Mga diplomatang Pilipino, opisyal, guro at mag-aaral ng Peking University na dumalo sa book donation ceremony
Si Yin Ziyou ay kasalukyang kumukuha ng Philippine Studies sa PKU. Ayon sa freshman sa kanyang 3 buwang pag-aaral napuna niyang kakaunti ang mga babasahin hinggil sa Pilipinas. Ngayon salamat sa donasyon, mas marami na siyang mga aklat na puwedeng gamitin sa kaniyang pananaliksik.
Ang School of Foreign Languages Library ay isa sa pinakamalaking aklatan sa PKU. Ang mga libro na ibinigay ng pasuguan ay magiging bahagi ng higit 200,000 reference materials na isinulat sa 22 wika.
