|
||||||||
|
||
Sa kanyang paglalakbay-suri kamakailan sa katimugan ng bansa, tumayong-saksi si Premyer Li Keqiang ng Tsina sa pagpoproseso ng unang pautang ng WeBank, pribadong bangkong nagtatampok sa online services na pinamumuhunanan ng Tencent, isa sa mga Internet giant ng Tsina.
Ayon kay Zhao Xijun, Propesor sa pinansya ng Renmin University of China, ipinakikita nito ang pagpapahalaga ng Pamahalaang Tsino sa pagpapaunlad ng mga pribadong bangko at online financial services.
Noong 2014, inaprubahan ng China Banking Regulatory Commission (CBRC) ang pagtatatag ng limang bagong pribadong bangko. Dalawa sa mga ito ay may puhunan ng Alibaba at Tencent, dalawang pangunahing Internet company ng Tsina, ayon sa pagkakasunod. Nauna rito, ang China Minsheng Bank ay nagsilbing siya tanging pribadong bangko ng bansa.
Noong 2014, sa kauna-unahang pagkakataon, mababasa sa working report ng Pamahalaang Tsino ang hinggil sa pagpapasulong ng online financial services.
Ayon sa pinakahuling datos, lumampas na sa 600 milyon ang bilang ng netizens ng Tsina. Katumbas ito ng halos kalahating populasyon ng bansa.
Sinabi ni Zhang Yuewen, mananaliksik ng Chinese Academy of Social Sciences na dahil sa bagong plataporma at bentahang panteknolohiya, mas maraming mamamayang Tsino sa kanayunan at maliliit at katamtamang laking bahay-kalakal ay makikinabang sa online financial services.
Gayunpaman, ang seguridad ay isa sa mga pangunahing hamon na kinakaharap ng Internet-focused banks. Ayon sa isang survey, noong 2013, halos umabot sa 150 bilyong Yuan ang kapinsalaang pinansyal online ng mga netizen. Ang pamimili online ay ang pangunahing dahilan ng nasabing kapinsalaan.
Salin: Jade
| ||||
© China Radio International.CRI. All Rights Reserved. 16A Shijingshan Road, Beijing, China. 100040 |