Sa nalalapit na Chinese New Year na magsisimula sa ika-18 ng Pebrero, magbibiyahe sa London ang pamilya ni Gang Fang, babaeng taga-Hangzhou, lunsod sa lalawigang Jiangsu sa dakong silangan ng Tsina.
Ito rin ang unang pagsakay ng eroplano ni Wowo (Ring ang kanyang English name), 18 buwang anak ni Gng. Fang. Mahigit 10 oras ang biyahe sa eroplano. Nangangamba si Gng. Fang na gambalain ni Ring ang mga pasahero kung iiyak siya. Kaya, sa ngalan at paraan ng pananalita ni Wowo, nagdrowing si Gng. Fang at kanyang asawa ng mga kard bilang paghingi ng paumanhin para sa iba pang pasahero. Kasama ng kard ang tsokolate na lakip sa isang red envelop.
Helo, ako po si Ring (Wowo). 18 buwan lang po ako. Hindi pa po ako masyadong marunong magsalita at hindi ko rin maintindihan ang iba.
Ito po ang aking unang paglipad sa eroplano. Ang mag-asawa na mukhang nababahala po ay ang mama at papa ko. Iyong dalawang mababait na nakakatanda po ay ang aking lolo at lola. Lilipad po kami papuntang London sa nalalapit na Spring Festival (Chinese New Year).
Bata pa po ako. Sa aking unang paglipad, baka sumama po ang aking pakiramdam. Baka hindi ko po makontrol ang aking sarili, mag-iiyak o maghihiyaw dahil sa di kumportable ang biyahe, o kaya ay mag-ingay dahil sa labis na saya. Pero, ako po at ang aking pamilya ay magsisikap sa abot ng aming makakaya para manatiling tahimik at hindi kayo magambala sa mahabang biyaheng ito.
Humihingi po kami ng paumanhin kung sakaling mabibigo kami. Hindi ko po malilimutan ang lahat ng mababait na taong nagbibiyahe kasama ko sa aking unang paglipad sa buhay ko. Binabati ko po kayo ng maligayang bakasyon sa Spring Festival at nawa'y maging suwerte ang taong ito sa inyo.
Bilang pagsunod sa tradisyon ng Chinese New Year, inihahanda rin ng Gng. Fang ang mga red envelop na nakabitin ang palawit na pansuwerte at lakip ang kard na pampaumanhin at dalawang tsokolate.
Si Gng. Fang ay empleyado sa isang supermarket sa Hangzhou at mahilig siyang magdrowing. Ang kanyang asawa naman ay isang tagadisenyo. Si Fang ang nagdrowing ng mga kard at ang kanyang asawa naman ay nagkulay sa mga ito. Apatnapung piraso ang balak nilang ipamibagay sa mga kapuwa pasahero.
Photo source: dushikuaibao (City Express), diyaryong nakabase sa Hangzhou
Salin: Jade
Proof-reading: Mac
