Sa pamamagitan ng mayoryang boto, pumasa kahapon sa unang pagbasa ang panukalang batas ng Thailand hinggil sa paglilimita sa kilos protesta.
Pero, kailangan pa itong dumaan sa second at third reading para maging batas.
Kaugnay ng panukalang batas na ito, sinabi ni Winthai Suwari, tagapagsalita ng pamahalaan ng Thailand na ang layunin nito ay hindi ipagbawal ang demonstrasyon ng mga mamamayan, sa halip, limitahin ang oras, lokasyon at paraan ng demonstrasyon.
Ayon sa nasabing panukalang batas, ipagbabawal ang mga mamamayan na magdemonstrasyon sa harap ng korte, gusali ng Parliamento at palasyo ng punong ministro. Kailangan ding ipaalam ng mga demonstrador sa kapulisan ang protesta nila 24-oras bago ito ganapin. Dapat ding aprubahan ng korte ang awtorisasyon bago lansagin ang isang demonstrasyon.
Salin: Jade