Nag-usap kahapon sa Switzerland sina John Kerry, Kalihim ng Estado ng Estados Unidos at Sergei Lavrov, Ministrong Panlabas ng Rusya hinggil sa isyu ng Ukraine at iba pa. Sinabi ni John Kerry na kasalukuyang nananatili ang sagupaan at patuloy na nagkakaroon ng kasuwalti ng buhay sa gawing silangan ng Ukraine. Aniya, kung hindi isasagawa ang tigil-putukan sa rehiyong ito, hindi totohanang maisasakatuparan ang nilalamang pampulitika sa New Minsk Agreement na narating noong Pebrero.
Sinabi naman ni Sergei Lavrov na ang nasabing nilagdaang kasunduan ay nagsisilbing nakitang bunga ng prosesong pangkapayapaan sa Ukraine. Aniya, sinuman na ipinagwalang-bahala ang naturang bunga at patuloy na nagbigay-sandata sa Ukraine ay dapat isabalikat ang responsibilidad sa pagsira sa prosesong pangkapayapaan ng bansa. Umaasa aniya siyang isasagawa ang reporma ng konstitusyon ng Ukraine para pangalagaan ang lehitimong karapatan at interes ng mga mamamayan sa silangan ng bansa.
Nang araw ring iyon, nagdiyalogo sa telepono ang mga lider ng Pransya, Alemanya, Rusya at Ukraine bilang tugon sa isyu ng Ukraine. Ayon sa kumunike na isinapubliko kahapon ng Palasyong Pampanguluhan ng Pransya, ipinalalagay ng apat na panig na kasabay ng pagsasagawa ng tigil-putukan sa ilalim ng superbisyon ng Organisasyong Panseguridad at Pangkooperasyon ng Europa, dapat nila pahigpitin ang ugnayan sa International Red Cross para pabilisin ang pagpapalaya ng nagsasagupaang panig ng mga bihag at pabutihin ang makataong kalagayan doon.
