Si Hua Chunying, Tagapagsalita ng Ministring Panlabas ng Tsina
Kaugnay ng sinabi ng Kagawaran ng Ugnayang Panlabas ng Pilipinas na ang konstruksyon ng Pilipinas sa mga isla ng South China Sea ay ginawa bago ang paglagda sa Declaration on the Conduct of Parties in the South China Sea (DOC) at ang konstruksyon naman ng Tsina ay ginawa pagkaraan ng paglagda sa deklarasyong ito, sinabi kahapon ni Hua Chunying, Tagapagsalita ng Ministring Panlabas ng Tsina, na walang katwiran ang naturang pananalita ng Pilipinas, at hindi ito nangangahulugang hindi lumabag ang Pilipinas sa DOC.
Ipinaliwanag ni Hua na ang ilegal na pagsakop ng Pilipinas sa ilang isla ng Tsina sa South China Sea ay pinanggagalingan ng pagtatalo ng dalawang bansa. Dagdag niya, ang mga aksyon ng panig Pilipino na gaya ng pagtanggi sa pag-aalis ng bapor sa Ren'ai Reef (Ayungin Shoal sa Pilipinas), pagpapanumbalik ng konstruksyon sa Zhongye Island (Pagasa Island sa Pilipinas), at unilateral na pagharap ng arbitration case hinggil sa pagtatalo sa South China Sea ay pawang paglabag sa DOC.
Sinabi rin ni Hua na hindi kinikilala ng Tsina ang di-umano'y kasalukuyang kalagayan ng ilegal na pagsakop ng Pilipinas sa mga isla sa South China Sea, at tinututulan din ang konstruksyon ng Pilipinas sa mga islang ito. Inulit niyang hinihiling ng Tsina sa Pilipinas na agarang itigil ang konstruksyon, at alisin ang lahat ng mga tauhan at pasilidad sa mga isla ng Tsina.
Salin: Liu Kai
