NANINIWALA ang mga kasapi ng Friends of Peace sa pamumuno ni Cotabato Archbishop Orlando B. Cardinal Quevedo at dating Comelec Chair at Constitutional Commission Member Christian Monsod na magiging katanggap-tanggap sa lahat ang panukalang Bangsamoro Basic Law na sumailalim ng pagsusurin ng National Peace Council.
Sa isang pagpupulong sa pagitan ng Foreign Correspondents Association of the Philippines at Friends of Peace sa Asian Institute of Management kanina, sinabi ni Cardinal Quevedo na napapaloob sa ulat na isinumite kahapon kay Pangulong Benigno Simeon C. Aquino III ang mga rekomendasyon ng National Peace Council sa mga probisyong ina-akalang magdudulot ng ibayong suliranin.
Ang mahahalagang punto ay ang principles of subsidiarity, principles of solidarity at devolution of powers. Sa anumang nilalaman ng Bangsamoro Basic Law, kailangan itong tumalima sa nilalaman ng Saligang Batas na Pilipinas.
Sa panig ni Atty. Christian Monsod, sinabi niyang ang Bangsamoro Basic Law ang isang pagtatangkang mabigyang laman ang dalawang mahahalagang probisyon ng Saligang Batas, partikular ang karatungang panglipunan at pagpapaunlad ng mga mamamayan o human development.
Ipinaliwanag pa ni Atty. Monsod na ito ang pinakapuso ng Saligang Batas at ang pinakamalubhang paglabag sa nilalaman nito ay nagawa sa mga Bangsamoro.
Matagal bago nabuo ang Bangsamoro Basic Bill sapagakt tumagal ito ng 17 taon. Ani Atty. Monsod, isinumite ang panukalang batas sa Kongreso at Senado noong Setyembre 2014 kaya't sana'y sinuri na kaagad ng mga nangangamba sa nilalaman nito.
Ang Bangsamoro Basic Law ay pagpapatuloy lamang ng peace process at ang mga mambabatas ay nagiging bahagi ng peace-building process sa Muslim Mindanao.
