Ipinahayag kahapon sa Beijing ni Tagapagsalita Hong Lei ng Ministring Panlabas ng Tsina, na hindi dapat maapektuhan ang relasyong Sino-ASEAN ng mga masalimuot na elementong gaya ng isyu ng South China Sea.
Sinabi ni Hong na kahit sa anumang kalagayan, ang esensya ng relasyong Sino-ASEAN ay nananatiling pagtitiwala, pagtulong at pagtuto sa isa't isa. Aniya pa, dapat malusog at matatag na sumulong ang estratehikong partnership ng Tsina at ASEAN, para patingkarin nila ang mahalagang papel sa kapayapaan at katatagan ng rehiyong ito.
Binanggit din ni Hong ang katatapos na Ika-21 Pagsasanggunian ng mga Mataas na Opisyal ng Tsina at ASEAN. Isinalaysay niyang ipinalalagay ng iba't ibang kalahok na panig na ang pagpapalakas ng pag-uugnayan sa isyu ng South China Sea ay makakabuti sa pagpapalalim ng pagtitiwalaan ng Tsina at ASEAN. Sumang-ayon din aniya ang iba't ibang panig na patuloy na magsikap para ang South China Sea ay maging karagatan ng kapayapaan, pagkakaibigan, at pagtutulungan.
Salin: Liu Kai