|
||||||||
|
||
TINIYAK ng mga kabilang sa minorya sa Mababang Kapulungan na susuriin nilang mabuti ang panukalang higit sa P 3 trilyon budget para sa taong 2016 na dumaan kay Pangulong Aquino noong Lunes.
Ang Makabayan Bloc na kinabibilangan nina Congressmen Neri Colmenares at Carlos Isagani Zarate ng Bayan Muna, Luzviminda Ilagan at Emmi de Jesus ng Gabriela, Terry Ridon ng Kabataan, Antonio Tinio ng ACT Teachers at Fernando Hicap ng Anakpawis ang magsasagawa ng masusing pag-aaral sa panukalang budget.
Ilalabas umano nila ang mga kaduda-dudang mga probisyong napapaloob sa 2016 budget proposal. Bukod sa pagsusuri sa panukalang budget, ipatatawag din nila ang mga kasapi ng Development Budget Coordinating Committee at mga pinuno ng mga kagawaran na mag-ulat kung paano nila ginastos at ginamit ang 2015 budget.
Ayon kay Congressman Ridon, nakakuha na ng mga impormasyon, datos at mga dokumento hinggil sa paggasta ng pamahalaan kaya't handa na silang magtanong sa panukalang budget.
Ang budget ng pamahalaan ay mula sa mga buwis na ibinayad ng mga mamamayan, mga kinita ng government-owned and controlled corporations at utang mula sa ibang bansa. Noon, may salaping nagmumula sa mga Overseas Development Assistance o ODA.
© China Radio International.CRI. All Rights Reserved. 16A Shijingshan Road, Beijing, China. 100040 |