Sa pagtataguyod ng Embahada ng Tsina sa Hapon, idinaos kahapon sa Tokyo ang isang talakayan bilang paggunita sa ika-70 anibersaryo ng tagumpay ng Anti-Japanese War. Lumahok sa talakayan ang mahigit 40 personaheng kinabibilangan ng mga tauhan ng embahada, mga kinatawan ng mga samahan sa pagkakaibigang Sino-Hapones, at mga iskolar na Tsino at Hapones.
Sa talakayang ito, sinabi ni Cheng Yonghua, Embahador ng Tsina sa Hapon, na ang paggunita sa okasyong ito ay para magpahayag ng komong hangarin ng Tsina at Hapon sa pangangalaga sa kapayapaan at pagpapasulong sa pagkakaibigan ng dalawang bansa.
Binigyang-diin ni Cheng na ang batayan ng relasyong Sino-Hapones pagkaraan ng Ikalawang Pandaigdig na Digmaan ay tumpak na pakikitungo at malalimang pagsisisi ng Hapon sa kasaysayan ng militarismong pananalakay. Aniya, bibigyan ng lubos na pansin ng komunidad ng daigdig, kabilang ang Tsina, ang pahayag kaugnay ng kasaysayan na ilalabas ni Punong Ministro Shinzo Abe ng Hapon. Umaasa aniya siyang ipapakita ni Abe ang responsableng atityud sa digmaan, at katapatan sa mga mamamayan ng mga nabiktimang bansa, at ipapangako rin ang paggigiit sa mapayapang landas.
Salin: Liu Kai
