[Special Report] Amicable settlement ang kailangan sa pagitan ng Pilipinas at Tsina; Hindi tatakbong muli para sa panguluhan

NANINIWALA si Manila Mayor Joseph Ejercito Estrada na mas makabubuting pag-usapan na ng Pilipinas at Tsina ang nababalitang 'di pagkakaunawaan hinggil sa karagatan at mga likas na yaman nito.

Ito ang isa sa kanyang mga binanggit sa isang round-table discussion sa mga mamamahayag ng mga news agencies ng Tsina kaninang umaga sa kanyang tanggapan sa Manila City Hall. Si G. Estrada na dating pangulo ng Pilipinas hanggang sumapit ang taong 2001, ay nagsabing mas kailangan ng Pilipinas ang Tsina kaysa Tsina ang mangangailangan sa Pilipinas.

Napag-iwanan na ang Pilipinas mula sa dating ikalawang puwesto nito kasunod ng Japan. Ipinaliwanag ni G. Estrada na nangunguna ang Pilipinas sa Hong Kong, sa Singapore, Malaysia, Taiwan at maging sa South Korea subalit napag-iwanan na sa maling pamamalakad at direksyong tinahak ng mga namuno sa bansa.

Magtutungo rin sa Tsina sa G. Estrada mula sa Linggo at magtatagal hanggang sa darating na ika-anim ng Setyembre. Nakatakda siyang dumalo sa pagdiriwang ng Tsina ng pagwawagi sa Ikalawang Digmaang Pandaigdig may 70 taon na ang nakalilipas. Babati siya liderato ng Tsina sa tagumpay ng kanilang mga programang naghatid sa magandang katayuan ng bagong superpower.

Para kay G. Estrada, malaki rin ang papel na ginampanan ng mga Tsino sa pagpapalaya sa bansa, partikular sa Maynila, mula sa mga kamay ng Hapones.

Kahit pa umano napasok ng mga Kastila ang bansa at nagturo ng pananampalataya ilang daang taon na ang nakalilipas, bago dumating ang mga Kastila sa Pilipinas, nakarating na ang mga Tsino at nagturo sa mga Pilipino ng kahalagahan ng kalakalan.

Malaki rin ang magagawa ng Tsina sa Pilipinas sapagkat kailangan ng bansa ang infrastructure, tulad ng paliparan. Napapanahon umanong lumahok ang Pilipinas sa Asian Infrastructure and Investment Bank na pinamumunuan ng Tsina. Umaasa si Ginoong Estrada na mapapadali ang pagpapaunlad ng mga pagawaing-bayan sa nalalapit na panahon.

Isa umanong magandang halimbawa ang nagawa ng Tsina na ngayo'y maaaring nangungunang economic power sa daigdig.

Naniniwala ang dating pangulo na ang pinakamagandang foreign policy ng Pilipinas ay ang pakikipagkaibigan sa mga kalapit-bansa sa Asia, tulad ng Tsina. Kahit pa umano nakarating na sa international tribunal ang isyu, kailangang maging praktikal ang Pilipinas at kailangang pag-usapan ng mahinahon ang mga 'di pagkakaunawaan.

Makakatulong din umano ang Tsina sa larangan ng pagsasaka. Hindi niya maunawaan kung bakit kailangang mag-angkat ng bigas. Mayaman ang lupain ng Mindanao subalit hindi mapakinabangan dahilan sa mga rebeldeng Muslim. Sa Luzon naman ay mayroong insurgency dahilan sa mga rebeldeng mula sa New People's Army. Ginawa na umano ng pamahalaan ang lahat kaya't naiwan na ang Pilipinas, tulad ng Malaysia, Singapore at Thailand.

Hinggil sa Bangsamoro Basic Law, nananalangin siyang magtagumpay subalit hindi siya umaasang magtatagumpay ito. Pinagtangkaan umano ng kanyang pamahalaang makipagkaibigan sa mga MILF subalit walang naganap na anumang kapayapaan.

Ito umano ang dahilan kaya't iniutos niya ang "all-out war" laban sa mga MILF.

Ipinangako rin ni G. Estrada na magpapatuloy ang paggunita sa mga nasawing turista mula sa Hong Kong may limang taon na ang nakalilipas. Magaganap ang paggunita samantalang siya pa ang punonglungsod ng Maynila.

Binanggit ni Mayor Estrada na hindi siya tatakbo sa panguluhan sa 2016 sapagkat marami pang gagawin sa Lungsod ng Maynila. Sa tanong kung sino ang inaakala niyang magwawagi sa darating na halalan, sinabi ni G. Estrada na kung sinoman ang kanyang iiendorso ang siyang magwawagi sa panguluhan.

Panalangin sa paggunita sa madugong Luneta Hostage Crisis idinaos

PINAMUNUAN ni Manila Mayor Joseph Ejercito Estrada at Councilor Bernie Ang ang panalangin kasama ang mga Buddhist monks sa Quirino Grandstand kaninang umaga bilang paggunita sa walong foreign nationals na napaslang sa hostage crisis sa kamay ni Senior Inspector Rolando Mendoza noong ika-23 ng Agosto 2010.

Anim na Hong Kong nationals, isang Canadian, isang British at isang Filipino ang nasawi sa insidente. Mayroong 21 turista at apat na Filipino sa loob ng sinamang-palad na tourist bus.

Sa panayam pagkatapos na panalangin, sinabi ni Mayor Estrada na pananatiliin ang kapayapaan at kaayusan sa lungsod sapagkat kung walang peace and order, walang anumang magandang magaganap sa lungsod.

Hindi umano niya papayagang maganap ang ganitong pangyayari sa ilalim ng kanyang pamumuno. Subalit kung maganap man, siya at ang pulisya ay kikilos kaagad.

Sa panayam, sinabi ni Mayor Estrada na maganda ang pagtanggap sa kanya sa pagdalaw sa Hong Kong upang humingi ng paumanhin sa naganap na insidente kahit hindi pa siya ang nanunungkulan sa Manila City Hall.