Idinaos kamakailan sa Phuket, Thailand, ang Komperensiya ng Pagpapalitan sa Turismo at Kultura ng Tsina at Thailand sa taong 2015. Ang aktibidad na ito ay itinaguyod ng Federation of Thai and Chinese Artists at Ai Jia You Science and Technology Ltd.. Lumahok dito ang mahigit 200 kinatawan sa iba't ibang sirkulo ng dalawang bansa.
Sa kanyang talumpati, sinabi ng Puno ng Phuket na palalim na palalim ang pagpapalitan sa turismo at kultura ng Thailand at Tsina. Aniya, sa mga turistang dayuhan sa Thailand, ang mga turistang Tsino ang pinakamarami. Aniya pa, ang komperensiyang ito ay makakabuti sa pagpapaunlad ng kabuhayan ng bansa, pagpapahigpit ng pagkaibigan ng mga mamamayan ng Thailand at Tsina, at pagpapalalim ng kanilang pag-uunawaan, para maglatag ng matatag na pundasyon sa pag-unlad ng relasyong Sino-Thai.
Sinabi naman ni Chen Jiang, Cultural Counselor ng Tsina sa Thailand, na pinahahalagahan ng Tsina ang pagpapaunlad ng relasyong pangkaibigan at pangkooperasyon sa Thailand. Nakahanda aniya, ang Tsina, kasama ng Thailand, na palalimin ang kanilang estratehikong pagtitiwalaan, pasulungin ang kooperasyong may mutuwal na kapakinabangan, at galugarin ang bagong growth point sa kooperasyon sa puhunan at turismo, para makapaghatid ng mas maraming benepisyo sa mga mamamayan ng dalawang bansa.
Salin: Andrea
