Nang kapanayamin kamakailan ng Chinese media, sinabi ni Sudirman Said, Ministro ng Enerhiya at Yamang Mineral ng Indonesya, na positibo siya sa prospek ng kooperasyon ng Indonesya at Tsina sa renewable energy.
Ipinahayag ni Said na matatag at di-magbabago ang mga patakaran ng Indonesya hinggil sa pagpapaunlad ng renewable energy. Aniya, ipinalabas na ng pamahalaan ng Indonesya ang batas hinggil sa pagbibigay-priyoridad sa renewable energy, at hihikayatin din ang mas maraming pamumuhunan sa pagpapaunlad ng renewable energy.
Samantala, sinabi ni Said na ang Tsina ay mahalagang kalahok at tagapagsuplay ng teknolohiya sa pandaigdig na pamilihan ng renewable energy. Umaasa aniya siyang palalakasin ng Indonesya at Tsina ang kooperasyon sa renewable energy, na gaya ng solar energy at wind energy.
Ipinalalagay din ni Said na kailangang isaalang-alang ng mga bansa sa rehiyong ito ang pagpapalakas ng kooperasyon sa connectivity sa enerhiya, bilang isa sa mga pangunahing aspekto ng rehiyonal na kooperasyon sa renewable energy.
Salin: Liu Kai