Dumalo sa New York nitong Martes, Abril 19, 2016 si Guo Shengkun, Ministro ng Seguridad na Pampubliko ng Tsina sa 2016 espesyal na pulong ng Pangkalahatang Asemblea ng UN hinggil sa isyu ng droga. Sa sidelines ng pulong, nakipag-usap siya kay Paiboon Koomchaya, Ministro ng Katarungan ng Thailand. Ipinahayag ni Guo na nakahanda ang Tsina na magsikap, kasama ng Thailand para ibayo pang palalimin ang pragmatikong pagtutulungan ng dalawang panig sa ibat-ibang larangan, upang mapasulong ang kanilang komprehensibong estratehikong partnership. Umaasa aniya siyang totohanang tutupdin ng dalawang panig ang komong palagay na narating sa unang Lancang-Mekong Summit at resolusyon ng naturang espesyal na pulong ng UN, at pahihigpitin ang pagpapalitan ng impormasyon sa paglaban sa droga para pangalagaan ang katatagan at seguridad ng rehiyon.
Ipinahayag naman ni Paiboon Koomchaya ang pagpapahalaga sa papel ng Tsina sa pagbibigay-dagok sa pagpupuslit ng droga at pangangalaga sa katatagan ng rehiyon. Nakahanda aniya siyang mapahigpit ang pragmatikong pakikipagtulungan sa Tsina sa security enforcement, lalo na sa paglaban sa droga.