IPINALIWANAG ni Brig. General Restituto Padilla na may sapat na tauhan ang Armed Forces of the Philippines at maging ang Philippine National Police upang hadlangan ang mga naglalayong manggulo sa darating na eleksyon.
Sa idinaos na Tapatan sa Aristocrat, sinabi ni General Padilla na may mga tauhan silang nagmamatyag sa mga barangay na dinaraanan ng mga nagpapabagsak ng power lines.
May mga tauhan din silang nasa operasyon lahat sa mga nais manggulo sa halalan.
Sa isyu ng Abu Sayyaf, walang humpay ang operasyon ng pamahalaan.
Sa panig ng Philipine National Police, higit na sa 3,000 katao ang nadakip dahilan sa mga paglabag sa batas sa gun ban.
Kinilala na ng pambansang pulisya ang siyam na magugulong lalawigan sa bawat halalang nagaganap sa bansa. Binanggit ni Police Chief Inspector Bryan Gregorio na ang mga lalawigang kanilang minamatyagan at pinadalhan na ng mga tauhan ay ang Pangasinan, Masbate, Negros Oriental, Western Samar, Maguindanao, Lanao del Sur, Abra, Nueva Ecija at Lanao del Norte
Ang mga dahilan kaya't deklarado ang mga ito bilang election watch list areas ay ang kasaysayan ng mainit na pagtutunggali sa larangan ng politika, mga nakalipas na insidenteng nag-uugat sa politika at sa halalan, pagkakaroon ng mga grupong kalaban ng pamahalaan tulad ng Abu Sayyaf Group, Bangsamoro Islamic Freedom Fighters at private armed groups na hawak ng mga politiko. Kinikilala rin ang isang pook na watch list sa paglaganap ng mga sandata sa bayan o lungsod.
