Sinabi ngayong araw, Huwebes, ika-5 ng Mayo 2016, sa Beijing ni Tagapagsalita Hong Lei ng Ministring Panlabas ng Tsina, na inaasahan ng kanyang bansa ang mainam na atmospera sa serye ng mga pulong ng mga mataas na opisyal sa kooperasyon ng Silangang Asya, na idaraos mula ika-7 hanggang ika-8 ng buwang ito sa Laos. Ito aniya ay para pasulungin ang pragmatikong kooperasyon ng iba't ibang panig, at pangalagaan ang kapayapaan at katatagan ng rehiyong ito.
Sinabi ni Hong na lubos na pinahahalagahan ng Tsina ang naturang mga pulong, at lalahok sa mga ito si Pangalawang Ministrong Panlabas Liu Zhenmin ng Tsina. Ilalahad aniya ng panig Tsino ang paninindigan sa pagpapaunlad ng mekanismo ng rehiyonal na kooperasyon ng Silangang Asya, at palagay sa mga isyung panrehiyon at pandaigdig.
Salin: Liu Kai